actuaciones estremaes 
La Ciudá nel Mar, Vero Rubio, Ferla Megía, Marisa Valle Roso, L-R, Tania Pereira, Picarós, La Garrapiella, Los Gascones, y una montonera d’agrupaciones tradicionales formen la programación d’eventos.
La primavera remata con una montonera d’eventos hasta esti domingu 22 de xunu. Esti xueves 19 el Centru de Cultura Antiguu Institutu de Xixón acueye l’estrenu en directo de La Ciudá nel Mar (20.30h, con entrada llibre), mientres que Vero Rubio actúa nel Burlesque Club d’Uviéu (20h, de baldre). El vienres 20 a les 19.30h l’Arca de Mozart toquen na Casa la Cultura de Noreña dientro del circuitu Asturies Cultura en Rede.
El sábadu Xixón va ser la protagonista de l’axenda musical con tres eventos nos que los sones y el baille del país van enllenar la villa de Xovellanos. Per un llau ta la Fiesta de la Música, na dende les 12.30h la mañana van actuar trece agrupaciones tradicionales en delles places y parques del conceyu y L-R a les 19h nel Parque del Cerilleru. A les 18.30h ye l’eventu Ciares en Danza nel campu fútbol de La Cruz y a les 19h La Folixa del Trubiecu nel Muséu del Pueblu d’Asturies.
Esti sábadu 21 tamién toquen la Bandina La Garrapiella a les 12h en Pravia y el tríu folk Picarós en La Figal de Xugabolos (Casazorrina, Salas). Per otru llau Mieres sigue coles fiestes de San Xuan qu’acueyen los desfiles del Grupu Baille Ruxidera (sábadu a les 13h na Plaza Requexu) y de la Banda Gaites Villa de Mieres (domingu a les 13h na Plaza Requexu); y los conciertos el sábadu de Ferla Megía (20h, Plaza Requexu), de Marisa Valle Roso (23.30h, PArque Xovellanos) y de Tania Pereira (domingu 22h, Cai Jerónimo Ibrán). P’acabar, Bual festexa’l día 22 el so XIX Domingo de Mercado nel que van poder vese a Los Gascones (12h) y l’espectáculu Tradicionando (19h).
Tola programación detallada d’equí a los próximos meses pue vese na Axenda de Musicasturiana.com.
