La música asturiana tien protagonismu nel XXVIII Festival Internacional de Música Antigua de Xixón. Hai un conciertu especial ‘De Sópitu’ de Forma Antiqva y una conferencia de Fonsu Fernández al rodiu esta obra que reflexa la filosofía del eventu. Fonte: Músicasturiana.com
Del 1 al 6 de xunetu celébrase’l XXVIII Festival Internacional de Música Antigua de Xixón (MUAX), eventu qu’axunta conciertos, cursos, conferencies y otres actividaes complementaries que tienen a la música d’époques como la Medieval, Renacimientu, Barrocu o Pre-clasicismu como puntu d’alcuentru. Na edición d’esti añu la música asturiana va tar presente con un conciertu y una charra que xira al rodiu’l discu nuevu de Forma Antiqva, De Sópitu. Amás, la imaxe del festival ta basada na llebre gaitera qu’apaez nel llibru manuscritu del sieglu XIV de la Regla Colorada, custodiáu nel Archivu Capitular de la Catedral de d’Uviéu.
Forma Antiqva van ser los encargaos de facer el conciertu inaugural del MUAX col programa basáu nel so trabayu nuevu, De Sópitu, Canciones, fandangos, saltones, jotas, giraldillas y otros brincos del Norte. Nél los siete músicos van dir tocando pieces del repertoriu popular asturianu con un formatu qu’entemez los instrumentos históricos col folclor, la tradición oral cola académica y la creatividá. Amás, como desplica’l responsable del Taller de Músicos de Xixón, Eduardo García Salueña, na actuación va plantease «un conceptu escénicu más próximu a la romería y va haber pa la ocasión una pareya de baille«. La cita va ser el martes 1 de xunu a les 20h nel Centru de Cultura Antiguu Institutu y les entraes anticipaes yá tán agotaes, pudiendo coseguise namás físicamente na taquilla del CCAI esi mesmu día dende les 17h.
Enantes de l’actuación de Forma Antiqva, Fonsu Fernández, director del Muséu de la Gaita de Xixón, va poner la conferencia De sópitu: un nuevo camino para interpretar la música tradicional asturiana. A les 18h nel Salón de actos de la Biblioteca Pública Xovellanos esti Doctor en Musicoloxía va falar d’una paradoxa cultural de los sieglos XX y XXI: mientres que la música escrita tornaba a los sos raigaños, la música oral alloñábase d’elles pa tar nel presente. Y De sópitu de Forma Antiqva ye un llanzamientu discográficu qu’axunta estes dos corrientes.
La llebre gaitera
Pa da-y más pesu a la música con identidá asturiana, el diseñador Juan Jareño escoyó como imaxe del MUAX 2025 el motivu animal presente na parte superior derecha de la primer páxina del llibru manuscrito de la Regla Colorada (Archivu de la Catedral de San Salvador d’Uviéu, último cuarto del sieglo XIV). Nél apaez sobre una orla pintada a tinta verde y colorada una llebre o coneyu tocando la gaita. «Esta representación sorraya asina la nuestra apuesta por visibilizar el patrimoniu históricu-artísticu y afitar diálogos ente repertorios, instrumentos y tradiciones«, despliquen dende la Fundación Municipal de Cultura, Educación y Universidá Popular del Ayuntamientu de Xixón, organizadora del eventu.
