‘Resollu’, el tercer discu de la banda de gaites Llacín (Llanes)

Yá ta en tiendes y en plataformes musicales Resollu, el tercer discu de la Banda Gaites Llacín qu’asoleyen 17 años dempués del so anterior trabayu. La reputadísima formación llanisca regresa con doce temes que van poner enriba l’escenariu el próximu vienres 4 de xunetu a les 22h en La Vega La Portilla (Llanes), nun conciertu de presentación nel que van participar los sesenta componentes de Llacín xunto con una trentena de músicos y danzantes ente los que s’inclúin dalgunos de los nomes más destacaos del folk asturianu. Amás, van tocar Felpeyu y Baxel pa convertir a esta cita nuna fiesta de la música asturiana.

Resollu ta formáu por doce temes que, en pallabres del codirector de la banda, Vítor Carbajal, ponen «un pie na tradición y otru na modernidá, busquen un soníu más potente de la banda y añaden propuestes sonores nueves que ruempen con tolo anterior». L’agrupación llanisca publica esta obra en CD y tamién en vinilu, siendo la primer vez en décades que s’edita un discu de gaita asturiana nesti formatu últimu, faciendo d’él cuasique una pieza de coleccionista.

A lo llargo de 53 minutos esti trabayu axunta dellos estilos, qu’asina presenta Carbajal: per un llau hai «sets de pieces propies del repertoriu tradicional asturianu con arreglos de folk acústicu, que tamién s’amesten a otres melodíes del Arcu Atlánticu». Tamién hai «composiciones nes que s’opta por otra llinia de soníu qu’inclúi baxu, batería y vientos metales». Los dos cenciellos ‘Camín de Glasgow‘ y ‘Resollu‘, enmárquense nestos sones. «Como contrapuntu presentamos otres propuestes nes qu’añadimos una llinia instrumental na que destaca’l pianu y el cuatru», un exemplu d’ello ye una versión del míticu ‘Chan Chan’ de Compay Segundo.

Amás Resollu recueye tamién pieces qu’inclúin programaciones electróniques y entemez temes compuestos por Vítor Carbajal, otros tradicionales y versiones como’l «homenaxe mui especial a Igor Medio y Carlos Redondo» con una reinterpretación de ‘Los fayeos de mayo’ de Felpeyu. Tamién destaca «l’apartáu vocal en tres de los temes, que nos permiten ufrir una propuesta más abierta de soníu, na que destaquen dos dances: una de Ponga y otra de Santa Marina de Parres (Llanes)», añade’l codirector d’esta banda de gaites.

Too esto da forma a esti ambiciosu trabayu, Resollu, que garra’l so nome del fenómenu natural que se da ente la roca y la mar provocando «la espulsión del aire en galeríes, escapando al esterior chorros d’agua de gran presión; una similitú cola fuercia de les gaites, les percusiones y los vientos metales», desplica Carbajal al rodiu un discu nel que tuvieron trabayando «dos años y mediu» ente l’estudiu de la Escuela de Música Tradicional de Llanes y los Tutu Estudios de Corvera, onde cuntaron cola producción de Lisardo Prieto y Sergio Rodríguez.

Una de les bandes más destacaes

La Banda Gaites Llacín surdió en 1998 nel conceyu Llanes pente los escolinos de la Escuela de Música Tradicional. Ye una de les más destacaes del país, con tres discos yá publicaos; xires per países como China o Estaos Xuníos; actuaciones nos principales festivales del xéneru y dellos reconocimientos y premios. Dende los sos anicios l’agrupación ta dirixida por Vítor Carbajal y Nuria Tarodo, y foi medrando a lo llargo’l tiempu de los 28 hasta los 65 componentes, convirtiéndose asina nuna de les bandes más numberoses d’Asturies.

El repertoriu qu’executa fai un viaxe pel patrimoniu musical asturianu dende los vieyos temes tradicionales a los más actuales, pasando per composiciones propies, y en delles ocasiones fai fusiones musicales con pieces de los paises que formen l’Arcu Atlánticu. Nel so tercer discu, Resollu, afonden nesti llabor qu’abrieron discográficamente con Tornallás (2002) y Xideces (2008).