Asturies nun se llibra de la fola de calor: anque va tar borrinosu, el termómetru va algamar los 35 graos. A partir del sábadu 28 les temperatures van ser «cimeres a les normales», según l’Axencia Estatal de Meteoroloxía. LNE
Llega la primer fola de calor del branu a España. Una masa d’aire bien templao va dexar temperatures d’hasta 42 graos nel sur de la Península y nun van baxar de los 23 nin peles nueches. Anque la situación n’Asturies nun ye tan estrema, les temperatures van ser altes. El llunes, por casu, van algamase los 35 graos en Cangas y los 33 n’Uviéu. Les mínimes sí dan una tregua nel norte y van baxar a los 17 graos a primer y última hora del día.
«A partir del sábadu 28 les temperatures van ser claramente cimeres a les normales». Estes son les palabres coles que l’Axencia Estatal de Meteoroloxía (Aemet) unvia una «avisu especial» a la población énte la fola de calor que va afectar a tola Península, anque en menor midida nel noroeste y l’área cantábrica.
N’Asturies los cielos van tar nublaos mientres tou la fin de selmana y tampoco se refuguen agües débiles y esvalixaes nel Cordal. Sicasí, espérense altes temperatures.
- El sábadu los termómetros van algamar los 24 graos n’Avilés, 26 n’Uviéu, 23 en Xixón y 30 en Cangas.
- El domingu, más calor. Espérense 26 graos n’Avilés, 28 n’Uviéu, 24 en Xixón y 34 en Cangas.
- El puntu álgido va algamase’l llunes, l’últimu día de la fola de calor según la Aemet. Pal entamu de selmana’l termómetru va algamar los 27 graos n’Avilés, los 33 n’Uviéu, 26 en Xixón y 35 en Cangas.
Calor estremo pa cerrar xunu Ye probable que se algamar los 40 graos en zones del valle del Guadalquivir y los 38 nel interior de la metá sur peninsular y puntos de la depresión del Ebro, va ser a partir del sábadu cuando s’espera que se superen de forma xeneralizada los 38, pudiendo algamar los 40-42 graos nos valles del Guadiana, Ebro y Guadalquivir, según nes depresiones del nordeste.
A partir del llunes 30 crez la incertidume sobro la evolución de les temperatures, debíu al pasu d’una perturbación n’altor que podría aumentar la nubosidad ya inducir nubes en zones del centru y esti peninsular, d’escasa precipitación y con posibles raches bien fuertes.
