Dempués de munchos años descatalogáu vuelve a tar a la venta namás na tienda de musicasturiana.com ‘Tornando al abellugu’l llar’, el tercer discu de Brenga Astur 💿 P’afondar nel álbum y na trayectoria d’esti grupu que tuvo n’activo ente 1994 y 2007 falamos con Fernando Montes, el que fuera gaiteru de la formación.
Falamos col gaiteru Fernando Montes d’esti trabayu que vuelve a tar a la venta dempués d’años descatalogáu.
Nel añu 2002 la denomada música celta taba viviendo ún de los sos momentos mayores d’espoxigue y Asturies, como país inxertáu nel Arcu Atlánticu, nun foi ayenu a esta fola intercéltica. Los grupos d’equí xiraben perdayuri llevando los sones de raigañu asturianu a otros territorios del mundu y fueron varios los nomes qu’anovaron la música tradicional entemeciéndola con sonoridaes más modernes que s’afitaben baxo esta etiqueta de «música celta».
Brenga Astur foi ún d’esos grupos. Fernando Montes (gaita asturiana en Si bemol, panderos y voz); Xabel González (curdiones); Fernando ‘Pindy’ Díaz (gaita asturiana en Si bemol); Pachu Cuesta (bouzuki); Tito Ruano (batería), Marta Arbas (voz); Javier Monteagudo (guitarra acústica y mandolina) y Francisco Calero (baxu eléctricu); formaron esti grupu folk-rock que tuvo n’activo dende 1994 hasta 2007, publicó tres trabayos discográficos y dio una montonera conciertos fuera d’Asturies.
El so trabayu últimu foi Tornando al abellugu’l llar (Fonomusic/Warner Music, 2002), un discu que dempués de munchos años descatalogáu vuelve a tar a la venta namás na tienda de musicasturiana.com. Esta razón y la propia calidá del CD fai que seya’l Discu del mes d’esti xunetu. P’afondar nel álbum y na trayectoria del grupu falamos con Fernando Montes, el gaiteru d’esta formación desapaecía.
Tornando al abellugu’l llar llevaba tiempu descatalogáu ¿Cómo foi qu’apaecieron unidaes d’esti CD?
Porque un amigu asturianu que trabaya en Washington ta trayéndonos discos que dexáremos per ellí de cuando tuvimos xirando col grupu per aquelles tierres nos branos de los años 2000, 2001 y 2002. Son dalgunos CDs que quedaron ensin vender daquella. Naquellos tres branos xiramos per 12 estaos de la costa Este d’Estaos Xuníos: Virginia, West Virginia, Maryland, Ohio, New Jersey, Pennsylvania, New York, Rhode Island, Connecticut, Massachussets, New Hampshire, Vermont, y Maine.
Habrá quien nun sintió esti discu que tien más de venti años. ¿Cómo presentaríes esti trabayu?
Esti tercer discu de Brenga Astur tien sobre manera folk afitáu en pieces tradicionales asturianes, pero tamién de composición propia basada nos ritmos y estructures d’esa música tradicional asturiana, con dalgunos otros temes que faen honor y homenaxeen, nun hermanamientu intercélticu, a la música de raigañu d’otros países del Arcu Atlánticu Celta.
Brenga Astur faciémos un folk o folk-rock celta asturianu, ye dicir, una música que bebiendo de los sones y ritmos tradicionales de, nesti casu Asturies, conviértese nuna música celta asturiana; o sea celta de raigañu asturianu. Ye celta porque ta basada na música tradicional d’un territoriu con un gran bagaxe de cultura celta, Asturies, pero ye tamién celta porque tien unes igües que tán acordies colos cánones de lo que se etiqueta güei día como “música celta”; ye dicir, una música tradicional celta con unos arreglos más actuales o modernos, que la lleven a asentase nesa etiqueta.
Mirando p’Asturies, el nuestru grupu de referencia foi siempre Beleño, pero, obviamente siempre fuimos grandes almiradores de la música de Llan de Cubel y de Felpeyu.
«Son dalgunos CDs que quedaron ensin vender na xira d’Estaos Xuníos, onde tocamos per 12 estaos de la costa Este nos años 2000, 2001 y 2002»
¿Qué supunxo esti trabayu dientro de la vuestra trayectoria?
El trabayu foi nel so momentu un pasu p’alantre dientro de lo que ficiéremos hasta esi momentu, enganchando lo que yá fixéremos nel segundu discu, pero con una meyor producción musical, na que m’impliqué y enfoté yo personalmente, con una meyor masterización, unos meyores arreglos y collaboraciones musicales. Favoreciónos bastante, nel tema económicu y de recursos de tou tipu, el pertenecer nesi momentu a Warner Music, una vegada que l’anterior sellu discográficu nel que tábemos, Fonomusic, foi compráu por Warner. En cualesquier casu, impusimos la condición de que’l discu guera grabáu y amestáu n’Asturies baxo la dirección de Fernando Malva nos estudios Groove, en Posada de Llanera.
Nel discu hai una montonera collaboraciones, ¿qué pues destacar d’elles?
Hai collaboraciones variaes, mui buenes y interesantes. Quiero sorrayar la del gaiteru d’orixe escocés pero nacionalidá norteamericana y residente en California Eric Rigler, el gran gaiteru qu’apaez en bandes sonores de películes perimportantes como Titanic o Braveheart. Per otra parte tenemos la participación del grandísimu zanfonista Germán Díaz, ún de los más prestixosos intérpretes europeos d’esti instrumentu. Cuntamos cola voz de Marta Elola en dalgunos temas, amás de la voz de la nuestra cantante Marta Arbas notres. Son impresionantes les xiblates, de tou tipu, tocaes por Jorge Mochales, al que perdimos en Brenga Astur, por fallecimientu, un par d’años dempués. Ta tamién la voz d’una tía mía Concha García, que fai voces y armoníes vocales xunto con Marta Elola nel tema ‘L’alcurdanza’l agua’. Como percusionista invitáu, tocando tabla y percusiones tribales adicionales cuntamos col prestixosu Serguéi Sapricheff y, amás del nuestru batería, tamién cuntamos cola caxa escocesa de Pablo Arce. Tuvimos la grandísima collaboración de los hermanos Luis y Xuan Antón Barbolla, tocando’l baxu y la bombarda, respectivamente.
«Quiero sorrayar la collaboración del gaiteru d’orixe escocés pero nacionalidá norteamericana Eric Rigler, el gran gaiteru qu’apaez en bandes sonores de películes perimportantes como Titanic o Braveheart»
Pasaron más de dos décades dende qu’asoleyastis esti discu. Cola perspectiva que vos da’l tiempu, ¿cómo resumiríes anguaño lo que foi la trayectoria de Brenga Astur?
Brenga Astur foi un más de los grupos folk o folk-rock que dio a conocer Asturies y la música asturiana per munches otres rexones de cuasi toa España y per unos cuantos países como Francia, Italia, Túnez o Estaos Xuníos. Tuvimos n’activo dende 1994 hasta’l 2007, añu nel que finó’l nuestru flautista y xiblateru Jorge Mochales y nel que decidimos non siguir. Pocos años dempués falleció tamién el que fuera’l nuestru batería, Tito Ruano.
Sacamos tres discos: “Raigaños Celtes”, “Cancios del Gochu Xabaz” y “Tornando al Abellugu’l LLar”
