- Alborecemos con nubes baxes na fastera central asturiana ya entrando nubosidá alta pel Navia, tando poco nuboso o escampláu nel restu con unes temperatures que tan alrodiu de los 18ºC, rexistrándose nel puirtu Payares 15ºC.
- Güei vamos tener el cielu nuboso con nubosidá de desendolque que va dir ganando terrén a partir del mediudía pa dexando pela tarde xarabatos de calter tormentosu na cordelera pudiendo estendese a otres zones d’Asturies al atapecer. Les temperatures en descensu ente llixeru y moderáu, sobre too nel interior y l’aire sedrá sele ya variable con predominiu de la componente norte.
- Mañana sábadu tendremos un día más seliquino, una vegada que se dixebren los borrinos y nublines del alborecer tendremos el cielu poco nuboso o escampláu, amás les temperatures tornarán a subir dalgo, asina y too de tarde, les nubes de desendolque medrarán y mos dexarán dalgún xarabato ya truena na cordelera pero n’esta vegada nun paez que vayan a estendese per otres fasteres d’Asturies. L’aire sedrá de componente norte con dalguna racha moderada na costa.
- El domingu aumentará la nubosidá ya mos dexará’l día nuble con un descensu llixeru de les temperatures y paez que la selmana viniente volverá a ser braniega con un ascensu de les temperatures según vayan pasando les xornaes.
