Cultura ultima’l llanzamientu del reconocimientu llingüísticu Alfaya col respaldu d’Empreses y Profesionales pol Asturianu. L’asociación, presentada güei na FIDMA, axunta yá 30 asociaos que xeneren cerca de 300 emplegos. La conseyería prevé poner en marcha’l distintivu a lo llargo d’esti añu como ferramienta de normalización llingüística.
- La marca ta concebida pa reconocer y visibilizar el compromisu empresarial coles llingües propies d’Asturies. El llanzamientu de la reconocencia llingüística va ponese en marcha a lo llargo del añu como ferramienta de normalización.
La conseyera de Cultura, Política Llingüística y Deporte, Vanessa Gutiérrez, reunióse esta mañana cola Asociación d’Empresarios y Profesionales pol Asturianu (EPPA), que collaboró na definición de la estructura de la marca, na Feria Internacional de Muestres d’Asturies (FIDMA). Na xunta participó la vicepresidenta de la entidá, Susana Rubio; el vocal Inaciu Iglesias y el presidente, Xosé Xicu Mata.
L’asociación, creada en 2025, surde como evolución d’un grupu nacíu tres la primer edición del Reguerada Fest, qu’organiza la conseyería. Anguaño, EPPA cuenta con una trentena de socios, que sumen en conxuntu cerca de 300 trabayadores, y tien como oxetivu promover l’usu y la visibilidá de la llingua asturiana y del eonaviegu nel texíu empresarial del Principáu.
La xunta de los profesionales cola conseyera sirvió tamién pa reforzar el futuru usu de la marca Alfaya, concebida pa reconocer y visibilizar el compromisu empresarial coles llingües propies d’Asturies y que se va poner en marcha esti añu. EPPA collaboró na definición de la estructura de la marca, na que ta previsto establecer trés niveles de compromisu llingüísticu:
- Nivel inicial o simpatizante: accesu al distintivu con solicitú d’adhesión.
- Nivel intermediu: requisitos mínimos como ser amigable col usu, recibir y responder comunicaciones y da-y cierta visibilidá na actividá empresarial.
- Nivel d’escelencia: pa empreses con compromisu activu, con midíes como formación interna, páxines web billingües o campañes de promoción.
Amás del distintivu Alfaya, la Conseyería de Cultura, Política Llingüística y Deporte mantién una serie de llinies d’ayudes en concurrencia competitiva dirixíes a empreses que quieran desenvolver actividaes n’asturianu o eonaviegu. En total, son cuatro les convocatories disponibles: ayudes a empreses del sector editorial; ayudes a medios de comunicación pa la normalización social de les llingües propies; ayudes a empreses p’actividaes de normalización llingüística; y ayudes al sector audiovisual pa la producción de conteníos que suponen un total d’alredor de 450.000€.
