Entama’l XVIII Festival Internacional de la Gaita de Villaviciosa

Güei arranca la XVIII edición del Festival Internacional de la Gaita de Villaviciosa (FIG), ún de los eventos más destacaos pa la música n’asturianu. Hasta’l domingu 7 va desendolcase na capital maliaya una programación qu’inclúi conciertos, pasucáis, concursos, esposiciones, charres, talleres, mercáu y otres actividaes.

La programación entama esta tarde a les 18.00 cola esposición «Asturies notra dómina: Muncho más que ropa», qu’amuesa la colección de traxes tradicionales del grupu de baille San Félix de Candás. A les 20.00h, la BGV El Gaitero, anfitriona del festival, va facer un pasucáis al que-y sigue’l conciertu de Simon Bradley, Borja Baragaño y Julio Rodríguez, a les 21.00h nel Teatru Riera. L’apertura de puertes ye a les 20.30, y el conciertu va ser d’entrada llibre. Dempués del conciertu, torna la Jam Session Folk del festival, que va facese nel bar La Caleya les Indies, entamando a les 23.00h.

Al día siguiente, vienres 5, entama a les 17.00h el mercáu artesanu del FIG, acompañáu d’un pasucáis de la Banda Gaites Cabu Peñes. A les 18.15h, va haber una actuación de la Bandina de la BGV El Gaitero, siguía d’otra de la BG Cabu Peñes a les 19.00h. A les 19.30, ufiértase una charra de Balbino Fernández y Ricardo Soberado al rodiu’l llibru El Floréu de Gaita Asturiana. Les actuaciones de la BG Xinzo de Limia y de los escolinos y profesores de la escuela de la BGV El Gaitero, preludien la IX Nueche en Danza del FIG, onde van tar presentes, dende les 21.00h na Carpa’l FIG, los Escolinos de la Escuela de Música Tradicional de la BGV «El Gaitero», El Grupu Etnográficu L’Oriente, Pandereteros d’Anguaño y la Bandina Los Collaínos. N’acabando, escenariu llibre.

El sábadu 6 de setiembre, el festival ufre un taller al rodiu ‘La fabricación del payón y axuste del roncón na gaita asturiana’, que va tar impartíu por Pelayo Fernández. Va tener llugar de 10.30 a 12.30h nel Atenéu Obreru, y ye necesaria inscripción previa. Durante tol día les bandes de gaites y los grupos etnográficos que participen nel festival van tar faciendo pasucáis y actuaciones en distintes localizaciones de La Villa. Na Carpa’l Fig, Carlos Velasco y Chino «El Indio» van amenizar la hora’l vermú, de 14:00 a 16:00. Pa pela tarde, entama a les 16.30h el VII Alcuentru d’Artesanos d’Instrumentos Musicales Tradicionales. A les 18.00h, Ana Feito va tar impartiendo un taller didáuticu de música tradicional pa neñes y neños. Na carpa, y dende les 19.00, va tener llugar l’Alcuentru de Bandes de Gaites, onde van participar la BG Candás, la BG Xinzo de Limia, Roncones y Sonajas, l’Albokariak Herri Arte Eskolako, la BG El Centru, la propia BGV El Gaitero y el Grupu de Baille San Félix de Candás.

Nueches Folk y más

Previo a los conciertos de pela nueche, a les 21.00h la Bandina «Camín del Carmín» va animar la carpa al pie de la barra, pa dempués dar pasu a la Nueche Folk del FIG, a les 22.00h, colos conciertos de Felpeyu, Hevia, Malin Lewis y Skama La Rede.

Pal domingu 7 de setiembre, va cellebrase’l XV Concursu de Gaita «Memorial José Huerta», a les 11.00h nel Teatru Riera, previa inscripción de los participantes. A partir de les 12:00h, va haber actuaciones de bandines tradicionales pelos chigres de La Villa, con la Bandina Los Muíles, la Bandina l’Emboláu y la bandina de la BGV El Gaitero.

La entrega de premios del concursu va ser a les 14.00h, y va tar siguía d’un vermú tamién animáu poles bandines tradicionales. A les 17.00, Malin Lewis va tar faciendo un conciertu didáuticu na Ilesia de Santa María, y a les 19.00h entama’l VI Certame de Canción Asturiana «Xavi Solares», con Carlos Velasco, Alicia Villanueva, Andrés Cueli y Andrea Cueli, acompañaos de Valentín Fuente a la gaita. Yá pela nueche, a les 21.00h, ye la segunda nueche folk del FIG, onde vs poder sentise a Soi Panderetera, a los gallegos BÖJ y a N’Ochebre.

Programa por díes