Felpeyu: «Ye una prestosada que, pal país tan pequeñu que somos, tengamos bayura tala de propuestes musicales». La Voz
La mítica banda de folk asturiana asoleya cenciellu nuevu, «Si quies que baille contigo», y actúa esti sábadu nel Festival Internacional de la Gaita de Villaviciosa. La banda de folk asturianu Felpeyu anunció’l llanzamientu del so nuevu senciellu, tituláu ‘Si quies que baille contigo’, que cunta con dos tarrezas, unu homónimu y el cantar ‘Como te digo una cosa…’.
Les nueves creaciones del conxuntu lleguen ocho años dende la publicación del so últimu discu ‘Cerquina’ y cinco tres el so anterior llanzamientu, el senciellu ‘Saltones Expósitos’.
Felpeyu señaló que la tema ‘Como te digo una cosa…’ inclúi trés composiciones del violinista Lisardo Prieto, ente elles un homenaxe al escocés Angus Grant, con quien el grupu compartió momentos “bien prestosos”, y una muñeira inspirada nuna frase d’una película de los noventa, amás de la pieza Saltonos del repunante’.
El cantar que da títulu al llanzamientu ye una adaptación del cantar tradicional ‘La romería’ que la banda describió como “unu d’esos cantares asturianos de chigre con miles de versiones” y que se convirtió na primer lletra escrita pol baxista y vocalista Aníbal Menchaca pa Felpeyu.
Ocho años dempués de la publicación de Cerquina y cinco del llanzamientu del cenciellu Saltones Expósitos, Felpeyu torna con un cenciellu formáu por dos temes nuevos: «Si quies que baille contigo» y «Como te digo una cosa…». Estes dos pieces continúen la llinia sonora que caracteriza a una de les bandes fundamentales del folk asturianu; sicasí, tamién tienen novedaes, ente les que rescampla la incorporación de trés componentes nuevos nuna grabación: el vocalista y baxista Aníbal Menchaca y los cuerdistes Luis Nicolás (guitarra) y Alberto Ablanedo (buzuki). Pa conocer los nuevos caminos de la yá mítica banda folk asturiana, falamos con ellos sobre’l presente y el futuru.
—Tuvieron que pasar 8 años pa volver sentir música nuevo de Felpeyu. ¿Qué vos fixo parar tanto y que vos fixo volver?
—Foron ocho años de munchos cambios. De mano, unos meses depués de sacar el discu «Cerquina» tuvimos de volver a cambiar de cantante. El mesmu día que díbemos facer el primer ensayu con Aníbal Menchaca a la voz llegónos la noticia de la muerte d’Elías García, el nuestru buzukista daquella. Depués vieno la pandemia que paró too y qu’afectó enforma al trabayu de los músicos, momentu qu’aprovechamos pa sacar Saltones Expósitos, un amiestu de tres temes instrumentales que pue sentise nes plataformes. La precaridá llaboral llevó al nuestru percusionista Ruma Barbero a colar pa les islles Canaries a trabayar de profesor, anguaño cinco de seis trabayamos na enseñanza. Volver, volver… nunca marchamos.
—Sicasí, los conciertos siguieron en marcha, con cambeos na plantiya, añediendo per un tiempu a la curdionera Bree Delian, Alberto Ablanedo o Aníbal Menchaca.
—A pesar de toles torgues, siempre tuvimos la suerte de tener grandes collacios qu’amás son grandes músicos, xente comprometío cola música asturiana y que nun tiempín curtiu fueron quien a adaptase a Felpeyu. Esto fexo posible, anque fuere con un plizquín de retrasu, llevar el directu de «Cerquina» a sitios como Lorient, Albiez, Oporto, Ortigueira, Moaña, Ermua, Llión, amás d’una bona riestra de conciertos per Asturies. Rescampla tamién nesti tiempu’l conciertu que fiximos nel Teatru de La Llaboral de Xixón, con motivu de la Selmana de les Lletres Asturianes, dedicáu a Ígor Medio y que foi retresmitíu pola Televisión Pública Asturiana TPA.
—La perda d’Elías ye indiscutible na música asturiana pola so participación en proyectos bien bayurosos pero, ¿cómo influyó nel percorríu profesional de la banda?
—Si la perda d’Elías García ye indiscutible pa la música asturiana en xeneral, calcula pa un grupu en particular nel que tocare. No personal foi un collaciu mui cercanu dende qu’entamamos a tratanos en 1989 hasta 2019.
—Cola nueva espublización atopamos dos cenciellos, unu instrumental y otru que ye una adaptación de La Romeria. ¿Cómo vos decidistis por estos temes?
—La trayectoria musical de Felpeyu, no que cinca a los temes cantaos, vien marcada poles versiones de cantares bien conocíos del nuestru repertoriu coral / de chigre y de los qu’hai milenta versiones. La Romería ye un d’esos cantares que nos faltaba por visitar. Hai delles versiones d’otros grupos folk, como la qu’apaez nel primer discu de Lliberdón (Sonifolk 1988) o la de Corquiéu en Suaña (Tierra Discos 2009). Na nuestra, Si quies que baille contigo, intentamos da-y l’aire folk-pop característicu de los nuestros cantares, una intro de cuerda sele pa depués dir medrando cola voz, los solistes y los coros, rematando con otra vuelta sobre’l motivu del entamu. Tamién hai que solliñar que ye la primer lletra que fai pa Felpeyu’l nuestru cantante Aníbal Menchaca. En cuanto al tema instrumental, Como te digo una cosa…, ye tamién un vezu de la banda facer composiciones propies a partir de ritmos de la tradición asturiana, nesti casu un par de muñeres y un saltón, obra del nuestru vigulineru Lisardo Prieto. En cuanto a los arranchos arrancamos con un riff de cuerda y cambiamos un par de vegaes de velocidá y ritmu, marca de la casa.
—¿Ye esta espublización l’aniciu d’un percorríu pa un álbum nuevu?
—Home, esa ye la idea, pero ensin marcar un plazu concretu, siguir montando temes nuevos y en cuantes que tengamos una docenina d’ellos sacar un discu físicu.
—Anguaño, la inmediatez ye dalgo que caracteriza a la música. Los cenciellos primen nuna industria que ta dexando de llau l’asoleyamientu de discos completos y, de la mesma, la industria de los vinilos ta creciendo más y más. Como banda que lleva un tiempu paráu na cuestión de publicaciones, ¿cómo veis esti panorama?
—Son coses que yá vienen dándose va una temporadina y nello tamos. Dir sacando cenciellos ye una manera de dicir que siguimos trabayando, creando, ensayando… con gana tocar. En cuantes al formatu a la hora d’espublizar, Cerquina yá lu sacamos en vinilu en 2017, al traviés d’un mecenalgu a costafecha pa editalu nesi formatu.
—La música n’asturianu ta volviendo a garrar puxu con propuestes de xéneros estremaos como Ferla Megia, La ciudá nel mar, Pvxarra, Alienda… Dende la esperiencia de dellos años na escena ¿hai relevu na música que se vien faciendo?
—Ye una prestosada que, pal país tan pequeñu que somos, tengamos bayura tala de propuestes musicales interesantísimes cantaes nel nuestru idioma. En cuantes al nuestru xéneru, vien desendolcándose dende los años 70’ y sigue habiendo xente mozo que s’arrima a él. Nosotros namás aspiramos a nun estorbar, a que la xente nos vea col ciñu que se-y tien a los clásicos y non como unes vieyes glories.
