El nuevu discu de Marisa Valle Roso ye un cantu a les muyeres del carbón y a Asturies. Titúlase ‘Cenicientes’ y compónenlu diez temes nos que l’artista llangreana fusiona tradición y electrónica.
Nesti discu con nome de cuentu les protagonistes son reales y locales. D’ehí la portada, en recuerdu al zapatu que-y llanzó Anita Sirgo a un axente de la Guardia Civil na ‘fuelgona’ del 62.
Pa cuntar y cantar estes histories Valle Roso, sofítase nel folclor y la tradición, melodíes que conviven cola electrónica. El xiru qu’entamó nel so anterior trabayu, ‘Lo fugaz’, afítase nesti. Pa vivilu en directo hai qu’esperar al 18 d’ochobre, cuando presentará ‘Cenicientes’ nel Teatru de La Felguera.
Marisa Valle Roso: «Nun puedo dexar d´utilizar una ferramienta tan poderosa como la música pa dar voz a les muyeres». L’artista llangreana estrena güei «Cenicientes», el so cuartu discu d’estudiu y el más personal d’ellos.
