Una trentena de persones estremaes venceyaes a la cultura asturiana escoyeron los meyores trabayos discográficos publicaos ente’l 2000 y 2024. Musicasturiana.com
Dende l’añu 2000 hasta anguaño la música contemporánea d’espresión asturiana entró na so mayor fase d’evolución y madurez. Nesti cuartu de sieglu surdieron munches propuestes artístiques d’una montonera d’estilos estremaos que foron responsables d’arriquecer fondamente la calidá, la variedá y el volume de les referencies discográfiques que pueden enmarcase dientro de la música del país. D’esta manera, puede dicise que los caberos venticinco años foron una segunda edá d’oru pa la música asturiana. Too ello pesie a qu’esta escena tuvo qu’enfrentar la crisis que sufrió la industria discográfica por mor de la llamada «piratería» —y la so posterior reconversión hacia’l formatu dixital—; dos crisis mundiales —la financiera del 2008 y la del Covid-19, nes que la cultura volvió a ser una de les grandes damnificaes—; y unes tímides polítiques culturales asturianes que nun apostaron polos soníos autóctonos col mesmu puxu qu’otros territorios vecinos.
Coincidiendo col XXV Aniversariu del Anuariu de la Música Asturiana, la redacción d’esta publicación paeciónos escoyer los 25 meyores discos publicaos ente l’añu 2000 y el 2024. Pa ello fixo una encuesta a trenta persones —quince muyeres y quince homes— venceyaes a la cultura asturiana, con gustos musicales estremaos y con unes edaes comprendíes ente los ventidós y los setenta años. El resultáu ye un llistáu qu’abarca soníos como’l folk, asturianada, electrónica, rock, indie, canción d’autor… una amuesa de la pluralidá d’estilos colos que trabayaron los artistes del país nesti cuartu de sieglu y que MUSICASTURIANA.COM recuperamos pa esti mes dientro de la estaya de Discu del Mes.
1. N’ARBA – Inda ya ceu (2001, Discos L’Aguañaz)
N’Arba ye un grupu de cultu dientro del folk asturianu. Nacieron en 1997 en Cuideiru y, anque anguaño nun tán oficialmente disueltos, son mui pocos los conciertos que dan. Inda ya ceu ye l’únicu trabayu que publicaron, pero con él foron quien a facer que dellos de los sos cantares seyan güei auténticos himnos. Los temes nacen de pieces populares que’l vocalista de la banda, l’etnógrafu Xosé Antón «Ambás», recoyó per tola xeografía asturiana, pero que tán reellaboraos incluyendo instrumentos como’l baxu, guitarres y batería; dando asina una sonoridá enérxica y eléctrica al so soníu.
2. FELPEYU – Yá! (2003, Tierra Discos)
Felpeyu ye una de les bandes referenciales del folk asturianu y Yá! ye’l so álbum más reconocíu. Nél, hai temes d’autoría propia como «Los fayeos de mayo» —que yá fuera seleccionáu como meyor cantar de la historia de la música asturiana nel especial que RPA fizo pola XXXIX Selmana de les Lletres Asturianes—, amás de pieces tradicionales axeitaes al estilu del folk atlánticu que fai la formación. La so publicación supunxo l’estrenu de la discográfica Tierra Discos —que fundaron los mesmos componentes de la banda— y foi l’últimu trabayu que grabaron Igor Medio y Carlos Redondo enantes de la so muerte prematura.
3. ALGAIRE – Coral y Maera (2022, Autoedición)
Algaire ye una de las formaciones más nueves de la música asturiana; tanto pola so fundación —nacieron nel 2019— como pola edá de les sos componentes —que nun pasen los 35 años—. Les pandereteres y cantantes Loreto Suárez, Iratxe Espina, Carla Miranda y el guitarrista Juan Yagüe sorprendieron col so primer trabayu discográficu —y únicu hasta la fecha— nel qu’entemecieron cantares tradicionales y de composición propia con sonoridaes como’l rock, la electrónica o los ritmos llatinos. Too ello con delles collaboraciones mui destacaes. El discu llevó importantes reconocimientos y ta acompañándolu una estensa xira.
4. TUENDA – Tuenda (2005, Tierra Discos)
En 2003 Xosé Antón «Ambás», Pepín de Muñalén y el fináu Elías García crearon una de les formaciones de música tradicional más reputaes d’Asturies. Nacieron col enfotu de rescatar el repertoriu de la tradición oral asturiana, arreglándolu namás con voz, buzuqui y flauta, y grabándolu pa qu’asina se caltenga nel tiempu. Con esti oxetivu de reconocimientu de la música popular, publicaron ente 2005 y 2011 tres discos que son referenciales dientro del folk de cámara. El primer d’ellos, l’homónimu Tuenda, ye’l más aclamáu por crítica y públicu.
5. L-R – Post-folk asturianu (2018, Rubén Bada Discos)
Dos años depués de qu’entamaren a esperimentar na cocina de la so casa cola pandereta, la voz y la guitarra, Leticia Baselgas y Rubén Bada asoleyaron un discu que revolucionó la música del país: Post-folk asturianu. Con él nacía tamién el post-folk, xéneru que ruempe con tolos dogmes de la tradición al amestar la música tradicional con soníos como’l rock, el blues o’l jazz. La propuesta convirtió a esti dúu nún de los más reputaos y versátiles de la escena, algamando actuar tanto nos eventos más tradis como nos festivales más indie.
6. LUCAS 15 – Lucas 15 (2008, Lloria Discos)
Anguaño son munches les formaciones de la llamada «música independiente» o «alternativa» de tola península ibérica que recurren a los soníos de raigañu de los sos territorios d’orixe pa crear nuevos temes. Sicasí, nel 2008 la situación yera bien distinta y Lucas 15 foron unos pioneros. El dúu encabezáu por Xel Pereda y Nacho Vegas anticipóse per más d’una década a esta fola axuntando rock y pop alternativu con temes del repertoriu de la música popular asturiana. El trabayu foi tou un éxitu que convirtió a Lucas 15 nun grupu de cultu y inda güei hai muncha xente naguando por una segunda referencia discográfica del proyectu.
7. LLAN DE CUBEL – La lluz encesa (2019, Autoedición)
Venti años depués de la publicación del so anterior trabayu, Llan de Cubel volvieron a l’actualidá discográfica cola edición del so esperáu sestu discu. Esta formación creada en 1984 ye una de les más reputaes y influyentes del folk asturianu y con La lluz encesa amosaron perbién que dos décades d’espera pagaron la pena. Catorce temes d’una finura y un gustu esquisitu dan forma a un discu que reflexa’l bon estáu de salú del que tamién ye’l grupu folk más llonxevu d’Asturies.
8. CORQUIÉU – Salia (2005, Tierra Discos)
Corquiéu ye una de les bandes más destacaes del folk asturianu. Formaos en 1997 en Ribeseya, les sos canciones son reellaboraciones de pieces tradicionales y composiciones propies onde s’alcuentren soníos de calter celta, pop y acústicu. El so segundu trabayu, Salia, inclúi dalguna de les pieces más icóniques de la formación como «Viquina» o «Ribeseyana»; mesmamente, esti últimu cantar foi versionáu hasta en Xapón.
9. SERGIO RODRÍGUEZ – Tutu Studiu 07 (2007, Discos L’Aguañaz)
Sergio Rodríguez ye inxenieru de soníu y responsable de Tutu Estudios, estudiu de grabación pel que pasaron la mayor parte de los grupos del folk asturianu. Tutu Studiu 07 foi’l so únicu trabayu en solitario nel qu’esperimentó cola música electrónica, col rock, col folk y cola asturianada. Nél suenen tamién les voces de Xosé Ambás, Héctor Braga, Herbamora, Dolfu R. Fernández y Celestina Ca Sanchu, qu’arriquecen un álbum qu’influyenció a los proyectos qu’anguaño trabayen axuntando electrónica y tradición.
10. ÍGOR MEDIO Y LISARDO PRIETO – Dual (2005, Tierra Discos)
Los componentes de Felpeyu Ígor Medio (voz y buzuqui) y Lisardo Prieto (violín) unieron la so esperiencia, complicidá y bon facer nesti álbum cásique fundacional de lo qu’anguaño se define como folk de cámara. Foi l’únicu discu que publicaron como dúu y nél reellaboren pieces tradicionales y toquen otres de composición propia nes que ye bien palpable la maestría, la sensibilidá y la personalidá d’ún de los músicos más recordaos del país.
11. ALFREDO GONZÁLEZ – La nada y tú (2009, Discos L’Aguañaz)
Nel 2009 muncho lloviera dende’l nacimientu del Nuevu Canciu Astur; aquel xéneru surdíu nos años 70 qu’algamó gran sonadía naquella época gracies a entemecer canción d’autor y llingua asturiana. Nesti discu el cantautor turonés Alfredo González da un pasu más na canción d’autor asturiana y presentó diez temes mui cuidaos no musical y no lliterariu que-y valieron el reconocimientu unánime de la crítica.
12. MARILUZ CRISTÓBAL CAUNEDO – Onde la ñublina posa (2001, Fono Astur)
Mariluz Cristóbal Caunedo ye ampliamente reconocida como la gran voz de la canción asturiana. Pesie a lo muncho que llevaba pisando escenarios —tanto en concursos de tonada, como acompañando a Hevia por mor de poner voz nel míticu «Busindre Reel»—, nun foi hasta’l 2001 cuando grabó’l so primer discu en solitariu. El trabayu supunxo toa una novedá dientro de l’asturianada, abriendo a esti xéneru a la incorporación de nueves sonoridaes y marcando un puntu d’inflexón que depués diben siguir otres cantadores.
13. ANABEL SANTIAGO – Al son de la lluna (2003, Discos L’Aguañaz)
Anque debutara discográficamente nel 2001, el so segundu discu, Al son de la lluna, ye consideráu’l trabayu fundacional d’una propuesta pionera como la que fixo Anabel Santiago. Con ella, música electrónica, asturianada y folk entemeciéronse pela primer vez, dando orixe a toa una revolución dientro del xéneru, que lu llevó a esperimentar una renovación digna del recién estrenáu daquella sieglu XXI.
14. MAPI QUINTANA Y ELÍAS GARCÍA – Severina (2014, Autoedición)
El siempre recordáu Elías García axuntóse a Mapi Quintana pa crear un dúu acústicu que marcó un enantes y un depués a la hora de reinterpretar la música tradicional. La cenciellez y la calidez d’un buzuqui, un contrabaxu y una voz privilexada dan forma a les nueve pieces presentes nesti trabayu enllenu de sensibilidá.
15. DIXEBRA – Glaya un país (2000, Discos L’Aguañaz)
Cola publicación del so quintu discu, Dixebra inauguraben el mileniu entrando pela puerta grande. Glaya un país supunxo la consolidación definitiva de la banda decana del rock astur, gracies a la incorporación de nueves sonoridaes —rap, electrónica, asturianada…— ensin perder de vista’l punk, el reggae y la música de raigañu tradicional. Himnos como «Mañana fría», «La danza» o «La partida» suenen ente los once cortes que dan forma al trabayu.
16. SONCAI SYSTEM – Clashturies (2007, Discos L’Aguañaz)
Xune Elipe (Dixebra) y Sergio Rodríguez (Tutu Estudios) encabezaron esti proyectu esclusivamente d’estudiu que supunxo una bocanada d’aire fresco dientro de la música n’asturianu. Clashturies foi un discu que contó cola participación de destacaos músicos de distintes escenes del país y qu’axuntó sones como’l reggae, funk, hipop, jazz o raggamufin a lo llargo d’once temes. Con él, l’asturianu sonó al mesmu nivel qu’otres llingües que taben faciendo propuestes asina de mestices y novedoses ensin perder de vista la identidá propia.
17. XAIME MARTÍNEZ – Ósculos d’agua nel imperiu asturianu (2018, Araz)
El músicu y escritor Xaime Martínez sorprendió col so primer —y únicu hasta la fecha— trabayu en solitariu. Nél amosó tola esperiencia algamada dientro del so anterior grupu, La Bande, y espeyó nun llibru-CD once temes que musicalmente beben del pop y el folk anglosaxón y de la música asturiana. Les lletres narren la historia del «imperiu asturianu» dende la so fundación hasta la salida de la cárcel de Tomasín, dando como resultáu un álbum conceptual únicu.
18. RODRIGO CUEVAS – Manual de cortejo (2019, Aris Música)
L’axitador folclóricu yá conquistara a toa Asturies col single «Ritmu de Verdiciu» y la espectación yera máxima pa sentir el so primer discu de llarga duración. Manual de cortejo aportó cola producción del prestixosu Raül Refree y nél hai quince cortes protagonizaos por temes de raigañu de dientro y fuera d’Asturies. Supunxo una nueva forma d’interpretar la tradición y l’ascensu de la figura más reconocida y querida de la música asturiana actual.
19. MUYERES – Humanes (2020, A Mansalva)
Ventiséis años depués de la publicación del so primer discu —consideráu una obra fundamental dientro de la música de raigañu—, l’agrupación de música tradicional Muyeres frayaron tolos esquemes col so sestu ábum. N’Humanes publicaron pela primer vez temes de composición propia que, amás, basáronse nes histories de les «humanes», eses muyeres anónimes que foron faciendo la historia. Un discu conceptual con trece temes enllenos d’orixinalidá.
20. DRD – Namái (2010, Fono Astur)
Tres de los músicos más pernomaos del folk asturianu, Dolfu R. Fernández (vigulín), Rubén Bada (buzuqui) y Diego Pangua (flauta); formaron esti tríu de folk de cámara que debutó con Namái. Nos catorce temes que formen l’álbum —la mayor parte, instrumentales— amuesen la so calidá como intérpretes y el bon criteriu a la hora d’esbillar y iguar temes de calter tradicional.
21. EVA TEJEDOR Y LES PANDERETERES – L’Entamu (2019, Algamar Producciones)
Eva Tejedor ye una de les grandes pandereteres d’Asturies. Tres formar parte per una montonera d’años del grupu Tejedor, la publicación de L’Entamu supunxo l’aniciu de la so carrera en solitario xunto a Les Pandereteres. Nesti trabayu recueye trece temes tradicionales y d’autoría propia que lleven a esti instrumentu a sonoridaes folk, esplorando nueves formes d’espresión pa la pandereta asturiana.
22. TEJEDOR – Música na maleta (2006, Autoedición)
Tejedor ye otru de los nomes imprescindibles de la música asturiana, amás de los que más repercusión internacional tuvo. Debutaron discográficamente en 1999 y col so tercer discu, Música na maleta, el tríu formáu por Javier Tejedor, José Manuel Tejedor y Eva Tejedor amosó tol bon facer de quien lleva décades algamando los más importantes reconocimientos nel mundu folk. Nél suenen pieces icóniques influyenciaes por soníos pop como «Seique non» o «Música na maleta».
23. SILVIA QUESADA – La pena abierta (2014, Algamar Producciones)
Tres de llevar unos cuantos años cantando en formaciones folk como Gatos del Fornu, Blima o Tejedor; Silvia Quesada estrenó la so carrera en solitario con La pena abierta. L’álbum —con música y lletres d’Alfredo González— foi toa una novedá dientro de la canción d’autor n’asturianu y a lo llargo de los diez temes que lu formen pueden sentise estilos como’l pop, la ranchera o’l boleru.
24. SKAMA LA REDE – La nuesa hestoria (2005, Discos L’Aguañaz)
Nesti cuartu de sieglu’l rock astur pasó de ser prácticamente un oasis con Dixebra, a consolidase como escena col surdimientu y caltenimientu nel tiempu de delles formaciones. Skama la Rede foi una d’elles y nel so primer trabayu, La nuesa hestoria, plasmaron la so personalidá inconfundible: l’amiestu de ska, punk, reggae y folk con unes lletres combatives, a la par qu’iróniques; una receta que los fai llevar venti años pisando escenarios destacaos.
25. MAPI QUINTANA – La Maramoniz (2023, Páxaru Verde Producciones)
Depués de nueve años ensin publicar un discu, Mapi Quintana regresó cola publicación de dos aclamaos trabayos. La Maramoniz ye ún d’ellos y nél asoleya siete temes nos qu’entemez la tradición asturiana nes melodíes y temátiques con estétiques más vanguardistes nos arreglos. Nél hai cantares populares y composiciones propies col telón de fondu de la güela d’esta artista l.leniza y l’aldea na que vivía, que da nome al álbum.
