L’eventu va entamar el vienres 10 d’ochobre a les 19.00h cola presentación del proyectu ‘Xoyería Tradicional Asturiana’, de Laura López. N’acabando, van entamar a les 20.00h los pasabares y los cantos de chigre coles agrupaciones Bandina Los Llerones, Grupo Surco, Xeitu y la Escola de Gaitas de Ortigueira. A les 22.00h, espicha, y pa rematar la folixa, a les 23.00h va facese una nueche en danza colos grupos y escenariu abiertu.

El sábadu entama’l día’l taller ‘Averamientu al panderu cuadráu de Peñaparda y los sos bailles‘, por Cefe Torres y David Vicente. A les 12.00h, la Escola de gaitas de Ortigueira va facer un desfile peles cais de Mieres. Dempués, a les 12.30h, va haber un taller de baille pa la reciella, y a les 13.00h, un taller de baille asturianu, charru y gallegu. Pela tarde, a partir de les 18.30h, hai desfile de grupos y alcuentru folclóricu, nel que participen el Grupu Folclóricu Prau Llerón, el Grupo Folclórico Surco y la Escola de Gaitas de Ortigueira. Dempués, van tar amenizando l’eventu la Bandina Los Collaínos. A partir de les 23.00h, van tener llugar los conciertos de Picarós, Os Carecos y DJ La Güeriata.

Domingu de la reciella

Pal domingu 12, va entamase la xornada cola tradicional alborada de gaita y tambor, a les 11.00h, dando pasu a la vienta’l bollu preñáu, dende les 11.30h y durante tola mañana. Pa esti últimu día de festival ufiértense delles actividaes pa la reciella, agrupaes baxo’l nome de ‘Domingu de la reciella’: va haber pintacares, rana y sogatira dende les 11:45, y a les 12:00 va facese un taller dirixíu por Mondo Manzana pa deprender a facer el xuegu del tres en raya con magaya de mazana reciclao. Pa rematar, Andrea Lobo lleva a Mieres el so espectáculu ‘Chirimabaina!’ Tola información y el contactu pa les reserves y los talleres puede alcontrase nes redes sociales de Prau Llerón y nel cartelu oficial.