Tres de la esperiencia d’hai unos años de Los Bolechas, TPA vuelve a tener programación infantil n’asturianu. Nesti casu trátase del remake de L’Abeya Maya, los históricos debuxos pa la reciella creaos nos años setenta y que s’anovaron nuna nueva versión dixital a primeros de la década 2010. Esti sábadu a les diez de la mañana ye esti estrenu televisivu nel qu’hai protagonismu de la música n’asturianu: Silvia Quesada ye quien pon voz a la sintonía de la serie.
«Contactóme Inaciu Galán pa ver si me prestaba participar nesti proyectu y dixi que sí. Tuvi que pasar una especie de preba pa la TPA y una vegada que dieron l’OK fui al estudiu de Luis Núñez en Xixón y grabamos col karaoke con esta música y canté per enriba», desplica la cantante sobre cómo surdió la oportunidá de pone-y voz a estos debuxos. El resultáu foi mui satisfactoriu: «pasélo pila; llegó un momentu nel que me sentí l’auténtica Abeya Maya y molóme muncho porque nunca grabara dalgo asina».
Pa facer la grabación la cantante «infantilizó» la so voz y metió-y «los coriquinos que van pel mediu que dicen maaaaaya». Acullá de la esperiencia musical, Silvia Quesada rescampla’l llabor de normalización llingüística d’esti cantar y d’esta serie: «Ye mui importante qu’un guah.e pueda llevantase pela mañana y ver n’asturianu unos debuxos que llevamos viendo tola vida». Asina ye como nagua por que haiga «munchos proyectos asina» que-y dean «naturalidá» al asturianu ente la reciella.
Una voz mui destacada
Silvia Quesada ye una de les voces más destacaes de la música asturiana. Nacida en Tinéu en 1986, entamó a cantar dende bien moza en formaciones folk como Los Gatos del Fornu, Blima, Muyeres y Tejedor. La so carrera en solitario principió en 2014 cola publicación de La pena abierta, un discu de canción d’autora que la consolidó como una de les meyores cantantes del país. Nel so últimu trabayu, Prefiero ver llover, l’artista lleva a la música n’asturianu a esplorar nuevos caminos sonoros, faciendo un pop eléctricu y enllenu de color que llevó’l Premiu AMAS a Meyor Discu d’Otres Escenes.
