25N Campaña para visibilizar y prevenir la violencia contra les muyeres mayores

Los Centros Asesores de la Muyer (CAM) del Principáu ufiertaron asistencia dende xineru a 64 muyeres mayores de 65 años víctimes de violencia de xéneru. D’elles, 39 solicitaron asistencia psicolóxica. La mayoría de los casos atendíos concentrase na área central, especialmente en Xixón.

Les profesionales que trabayen nestos recursos especializaos alverten que les muyeres mayores suelen amosar mayor resistencia a romper col agresor o allegar a los servicios disponibles, por cuenta de factores como la dependencia económica o l’aislamientu social. En munches ocasiones, la detección de los casos produzse nel ámbitu sanitariu.

Tocantes a la percepción social de la violencia de xéneru, los datos de la Delegación del Gobiernu n’Asturies amuesen que, anque’l 87% de les muyeres mayores considera inaceptable’l maltratu, un 35% sigui viendo normales ciertes conductes de control o discutinios habituales y un 10% acepta l’usu d’amenaces verbales en determinaes situaciones. Amás, el 67% nun recuerda campañes de sensibilización recién y solo una de cada cuatro conoz el teléfonu 016.

Dende’l 1 de xineru al 31 d’ochobre, seis muyeres mayores de 65 años ingresaron na Rede de Cases d’Acoyida —cuatro en Casar Malva, una n’Uviéu y otra n’Avilés—, lo que supon un 2,5% del total. Nesti períodu nun se produció nenguna derivación a centros residenciales del ERA.

Al respective de los feminicidios, en 2025 rexistráronse trés asesinatos de muyeres n’Asturies, una de les cualos yera mayor de 65 años.

Programa conmemorativo. 

El Gobiernu d’Asturies va entamar anguaño l’actu institucional nel nuevu Centru Cultural de Grau, el martes 25 de payares, a les 11:30 hores. Sicasí, les actividaes conmemorativas del 25N van celebrase a lo llargo de too el mes y van incluyir charres, conferencies y xornaes.

Dientro del programa previstu, el sábadu 22 de payares, a les 10:00 hores, la periodista ya investigadora Ana Bernal Triviño va ufiertar la ponencia Claves contra los bulos machistes, na sala 3 de Llaboral, Ciudá de la Cultura, en Xixón, a la que va siguir una mesa redonda na que periodistes d’Asturies van encetar el tratamientu de la violencia contra les muyeres nos medios de comunicación.

Les actividaes programaes van rematar el 1 d’avientu cola mesa redonda Muyeres mayores de 65 años: más difícil salir del maltratu, al cargu de la xeroantropóloga feminista Mónica Ramos Toru. Va Tener llugar nel Palaciu Conde Toreno d’Uviéu.

Materiales didácticos

A lo último, el programa Coeducastur ellaboró siete propuestes didáctiques destinaes a los ciclos d’Infantil, Primaria, Secundaria y Educación Especial que van poder descargase dende los centros educativos. Estos materiales van ayudar a promover la convivencia igualitaria y l’educación emocional, según a reconocer l’usu del llinguaxe y la so carga sexista, cavilgar sobro les relaciones igualitaries o detectar señales de violencia.

Estes unidaes reflexen el compromisu del Gobiernu d’Asturies cola educación n’igualdá, unu de les exes prioritaries de les polítiques de prevención de la violencia machista y de promoción d’una convivencia igualitaria nos centros educativos.

• Oficina de Normalización Llingüística de Xixón 

• https://fusionasturias.com/especial-mujer/alza-la-voz-el-25n-el-silencio-nunca-es-una-opcion.htm/ Reel /