Dempués d’estrenar en setiembre’l so primer álbum en solitario con un conciertu en La Benéfica de Piloña, Rubén Bada anuncia les seis primeres feches de la xira presentación del discu. Grau, Xixón, Teberga, Uviéu, Xixón, Glasgow.
Rubén Bada ye’l discu homónimu nuevu d’esti reputadísimu músicu’l país. L’artista llanzó un «trípticu» que tien trés estayes –‘Guitarra‘, ‘Vigulín’ y ‘Cantares‘- na que caúna fai referencia a trés óptiques dende les que Bada mira’l folk y la música tradicional. Con esta filosofía’l músicu avilesín va actuar el 15 de payares na Seronda en Danza de Grau; el 28 de payares na Taberna Narciso de Teberga; el 30 de payares en Lata de Zinc (Uviéu); el 18 d’avientu nel Meidinerz Jazz Club de Xixón; el 26 de xineru nel prestixosu Celtic Connections de Glasglow (dientro del espectáculu Celtic Odissey); y el 7 de febreru nun escenariu entá por anunciar.
Nestos conciertos van sonar les pieces que formen les trés estayes del so trabayu nuevu. En ‘Guitarra’ hai seis cortes con pieces interpretaes en xéneru instrumental col so instrumentu principal, emplegando’l so estilu de fingerpicking col que yá venía trabayando n’otros tantos proyectos. ‘Vigulín’ son cuatro cortes nos qu’ufierta pieces mui lligaes a la tradición del baille: xotes, muñeires, agarraos, etc., dalgunes tradicionales, otres de composición propia. ‘Cantares’ ye la parte dedicada a les coples y les melodíes tradicionales y populares, de chigre, pal baille, de tonada… Les igües d’estos temes son ocho ayalgues qu’amuesen quiciabes la visión más personal del músicu sobre estos repertorios.
Un músicu con proyección
Rubén Bada ye ún de los músicos de folk asturianos con mayor proyección internacional. Vigulineru, guitarrista y conocíu sobre manera por tocar el bouzouki, collaboró con grupos como Corquiéu, N’Arba, Dixebra… Foi miembru de DRD, Xéliba, L-R, y ta acabante d’asoleyar el so primer discu en solitario, amás de continuar col grupu Calea, y collaborar con una montonera grupos y agrupaciones na escena asturiana, ente los que se cunta Rodrigo Cuevas.
