Navelgas consigue viaxar al pasáu n’una nueche llena de tradiciones, oficios artesanales y sabores d’antaño. El colexu de la localidá cuartana recibió la “Panoya d’Oru” n’una nueva edición del Festival del Esfoyón y l’Amagosto. LNE
Navelgas, en Tinéu, volvió activar la so máquina del tiempu para esfrutar de les tradiciones rurales d’antaño na so XXIX Festival del Esfoyón y l’Amagosto, una cita emblemática del calendariu cuartanu que ta declarada fiesta d’interés turísticu rexonal. El barriu de Navelgas de riba allumáu solo cola lluz de les antorches ye l’escenariu para dar vida a antiguos oficios artesanales y costumes en redol a la celebración de la esfoyaza. Una xornada d’alcordances que tamién sirve para reconocer el trabayu en favor del caltenimientu de les tradiciones col galardón “Panoya d’Oru” qu’anguaño recayó nel colexu de la localidá.
“Siempres caltuvo les sos puertes abiertes y eso ye daqué que lo estrema, convirtiéndose n’una parte esencial de la vida del pueblu”, reconoció Alba Iglesias, presidenta de l’asociación cultural “El Arbedeiro”, colectivu organizador de la velada al pie de l’asociación de vecinos San Juan de Navelgas. Amás, Iglesias destaca la disposición a collaborar en cualquier actividá de la localidá del so equipu directivo y docente.
