TPA / El gripe aviar va acabar n’España en dos o tres selmanes.
El repique de biltos de gripe aviar n’Europa va acabar n’España en dos o tres selmanes. Ye lo qu’afita Juan José Badiola, unu de los mayores espertos en salú animal. Afita que’l riesgu alimentariu ye mínimu. Sorraya tamién qu’hai que tar alerta pa que siga ensin producise la tresmisión del virus ente humanos.
Grúes, coríos monteses y cigüeñes, que na seronda tornen dende’l norte d’Europa a África, y paren en ríes, llagunes o banzaos p’alimentase y folgar. Son les aves tresmisores del virus H5N1, causante de la pandemia actual.
Badiola fala del fin próximu del biltu n’España. Señala que la muerte recién d’un raposu infestáu nuna llaguna ente Teruel y Zaragoza, nun ye daqué novedoso, pero sí accidental.
La esmolición cimera ye evitar la contaminación de les aves monteses a les doméstiques, qu’entre nes granxes. Y por eso’l confinamientu.
Nestos tres años de pandemia animal, la mayor parte de les andaes en persones diéronse en xente del sector.
Nun hai evidencia científica, señala Badiola, de que’l virus tresmítese de persona a persona.
Afita que nun hai riesgu alimentariu, inclusive nel casu improbable de consumir carne o güevos contaminaos pol virus, siempres que tean bien cocinaos.
Badiola llama, en cualquier casu, a tener muncha vixilancia.
Criadores de pitu de caleya confíen en poder salvar la campaña de Navidá
Los pitos de caleya d’una esplotación de Morcín lleven zarraos dende empiezos del mes, anque solo dende fai 10 díes ye obligatorio faelo en tol país. El so propietariu, Amador García tomó esta decisión por prudencia. Espera que nenguna de les sos aves se contaxe de gripe aviar, lo que supondría sacrificar a tola esplotación de más d’un millar d’exemplares. Sobre manera agora, tan cerca de les navidaes.
Pel momentu, asegura que los sos veceros caltiénense y yá hai encargos pa les fiestes.
Otru problema ye que zarraos los sos pitos, comen más, lo que va suponer, si la situación s’allarga, un mayor costu en piensu.
Y espera que de cara a los próximos meses tampoco arraleza’l pitu pa criar, lo que-y obligaría a xubir el preciu.
