Francisco Javier Bizarro, Jorge Fernández Gonzalo y Virginia Casielles llogren el Premiu ‘María Luisa Castellanos’ nes modalidaes . La Dirección Xeneral d’Emigración convocó per primer vegada esti certame, al qu’allegaron trenta autores. Actualidá /
Les obres «El manzano», de Francisco Javier Bizarro Benítez; Les nubes estranxeres, de Jorge Fernández Gonzalo, y Ana emigra, de Virginia Casielles Pérez, llograron el Premiu María Luisa Castellanos nes modalidaes de narrativa, poesía y teatru, respectivamente.
El xuráu, formáu por Manuel Fernández de la Cera, espertu n’emigración y expresidente del Conseyu de Comunidaes Asturianes; Xuan Santori Vázquez, escritor y profesor, y Sonia García Galán, directora del IES de Llanera y especialista na obra de María Luisa Castellanos, designó a les persones ganadores n’analizando los trenta obres presentaes: 17 na categoría de narrativa, nueve en poesía y cuatro en teatru.
La Conseyería de Presidencia, Retu Demográficu, Igualdá y Turismu, al traviés de la Dirección Xeneral d’Emigración y Polítiques de Torna, resolvió con esti fallu la primer edición del Premiu Lliterariu María Luisa Castellanos, un certame creáu para reconocer obres inédites qu’enceten la emigración asturiana en tola so amplitú y dende cualesquier de los xéneros lliterarios incluyíos na convocatoria.
La ceremonia d’entrega d’estos galardones, dotaos con 3.000 euros para’l primer premiu, 2.000 para’l segundu y mil para’l terceru, va celebrase’l próximu 18 d’avientu, mientres l’actu de celebración del Día del Migrante, que coincide cola conmemoración internacional establecida por Naciones Xuníes. Nel eventu va reconocese públicamente’l valor de les obres distinguíes y la so aportación lliteraria a la memoria y la realidá de la emigración asturiana.
Con esta primer edición, el Principáu reafita’l so compromisu col espardimientu cultural venceyada a la diáspora asturiana, según col impulsu de les polítiques de torna y la visibilización del talentu creativo dientro y fora de la comunidá.
