Tres d’estrenar hai un mes ‘L.LIXEROS’, Abéu tornen col segundu adelantu del que va ser la so primer referencia discográfica: ‘K-MUDAR’ 
Trátase de ‘AGUILANDOS‘, una entrega compuesta por dos pieces tradicionales ‘LA PICA‘ y ‘LAS MURIAS‘ y nelles destaca la collaboración de componentes del Grupo folklórico Trebeyu. Musicasturiana.com /Les pieces tradicionales ‘La Pica’ y ‘Las Murias’ y la collaboración de Trebeyu dan forma a la nueva entrega d’esti cuartetu mozu.
Tres d’estrenar hai un mes ‘L.LIXEROS’, Abéu tornen col segundu adelantu del que va ser la so primer referencia discográfica: K-MUDAR. Trátase de ‘AGUILANDOS‘, una entrega compuesta por dos pieces tradicionales ‘LA PICA‘ y ‘LAS MURIAS‘ y nelles destaca la collaboración de componentes del Grupu Folclóricu Trebeyu.
Con esta entrega nueva d’unos cantares venceyaos a estes feches navidiegues, Abéu continúen desvelando característiques que van dar forma al so primer álbum en solitario, un trabayu del que falen asina: “K-MUDAR ye un proyeutu que pretende ufiertar una interpretación actualizada de la música tradicional asturiana dende’l soníu que nos identifica y que llevamos definiendo dende la creación del grupu en 2018, dende lo que somos, xirando tou al rodiu del relevu xeneracional, nel que confiamos y al que queremos poner en valor».
La publicación d’esti discu ta prevista pa la primavera de 2026 y, amás de los singles, Abéu tán en metá d’una campaña de crowdfunding na plataforma Verkami cola que yá lleven más de 5.000 euros recaudaos. La xente pue siguir faciendo hasta’l 20 d’avientu aportaciones al proyectu poniendo dende 22 euros hasta 100 euros. Dalgunos de los productos que se van recibir a cambiu son l’álbum en formatu caxa + usb, dos modelos de camiseta, sudadera, abanicu, botella d’agua, tote y hasta un collar, unos perendengues y una pandereta artesanal fecha por Edu Llosa -guitarrista del grupu.
7 años de camín
En 2018 cuatro adolescentes de Xixón venceyaos al Grupu Folclóricu Trebeyu crearon Abéu, una formación de voz y percusión tradicional. Pasín a pasu, esti grupu foi dando conciertos, ensayando, andando a la gueta d’un soníu que-yos convenciera… Anguaño la banda ta formada por Paula Vega (voz y percusión), Óscar Vega (voz y percusión), María Blanco (voz y percusión) y Edu Llosa (voz y percusión) y afirmen que «dempués de varios intentos dende la creación del grupu y de tener la sensación de nun dar cola tecla«, hai un tiempu qu’algamaron «la dirección que más representa a Abéu». Na primavera va vese’l resultáu con K-MUDAR, un discu nel que’l grupu afirma que quixo «esperimentar y arriesgar esperimentar y arriesgar pero calteniendo siempre’l soníu» que los caracteriza.
