D’Urria añaden tres temes más a ‘De Fuentesila a Primóu’. ‘Manolo mío’, ‘Ai pámpanu duru!’ y ‘Guerra’ completen una entrega que yá tien nueve pieces asoleyaes y de la qu’esperen llanzar cinco más. Musicasturiana.com
Yá ta en toles plataformes musicales una actualización de De Fuentesila a Primóu, el llanzamientu nuevu del grupu folk de L.laciana D’Urria. Tres d’asoleyar en xunu tres temes y n’agostu otros tres más, la formación añade agora tres pieces nueves: ‘Manolo mío’, ‘Ai pámpanu duru!’ -cola collaboración de la formación gallega de música tradicional BREO- y ‘Guerra’ -nel qu’andecha’l percusionista Migui Ocampo-. Toes elles siguen la llinia que caracteriza a esta formación qu’entemez cantares tradicionales con composiciones de creación propia.
El primer tema qu’abre esta serie nueva ye ‘Manolo mío’. «Ye un cantar tradicional mui popular y foi’l primeru que me me cantó mio güela Plácida«, desplica José Manuel Sabugo «Sabu» al rodiu d’esti tema. «Yo criéme con ella; foi mio madre -de fechu’l primer discu yera En Ca Pla porque a ella llamábemosla Pla-, y como morrió esti añu ye un homenaxe a ella«. Pa facer alcordanza d’ella tamién inclúi nesta pieza la voz d’ella «cuntando como cuntaba tantes coses de Rabanal».
El segundu ye ‘Ai pámpanu duru!’, un tema que musicalmente destaca porque ye la primer vez que D’Urria inclúin una gaita nuna grabación; nesti casu tocada pola formación folk gallega BREO. La lletra ta inspirada «nuna historia que se cuntaba en Cuevas del Sil» y que «Sabu» conoció gracies a la so tía Asunción Sabugo cuando él tenía «cinco o seis años».
«La historia de ‘Guerra’ fala d’un paisanu, Manolo Guerra, de San Miguel de L.laciana, que se dedicaba al estraperlu nel Puertu L.leitariegos dempués de la Guerra Civil, cuando se pasaben munches mercancíes d’Asturies pa Lleón y de Lleón p’Asturies», comenta’l cabezaleru de D’Urria al rodiu d’un tema compuestu por él mesmu y que s’inspira nel relatu ‘Las Brujas de Bustapiedra’ que recueye Julio Álvarez Rubio nel llibru Sendas de Laciana. «Esa historia fala d’ún de los pasos de Guerra pela Veiga’l Palo, onde se diz que daquella se xuntaben les bruxes de Bustapiedra pa facer aquelarres«. Musicalmente caltién l’estilu característicu de D’Urria y cunta cola collaboración de Migui Ocampo a les percusiones.
Otros cinco cantares más
Cola publicación D’Urria siguen, pasín a pasu, adelantando conteníos del que va ser el so segundu trabayu de llarga duración, De Fuentesila a Primóu. La banda l.lacianiega tien intención de grabar polo menos otros cinco cantares más que van dir incluyendo nesti llanzamientu a midida que los vaigan terminando nos estudios 15:40 de Gozón baxo la producción de Luis Senén Fernández. Esti material ve la lluz siete años dempués de que D’Urria s’estrenara dientro de la escena musical n’asturianu con En ca pla, un discu de que tuvo perbona acoyida y convirtió a esta formación l.lacianiega nuna de las más interesantes de la fornada nueva folk.
