La Ciudá nel Mar compilen los sos cuatro primeros temes nel EP ‘Lluminaria’. El cuartetu estrénase nun primer trabayu qu’amuesa una diversidá sonora que va del folk al indie y la calidá lliteraria de les sos lletres. PIECES TPA / Musicasturiana.com
Estrénase en toles plataformes musicales Lluminaria, el primer EP de La Ciudá nel Mar. El llanzamientu compila los cuatro temes qu’esta moza banda folk, pop, indie y canción d’autor foi asoleyando dende xunu d’esti añu y ye un reflexu de la diversidá sonora y la calidá lliteraria cola que trabayen Andrés García (guitarra), Marina Pangua (voz, percusión, guitarra), Celia Nieto (vigulín) y Ángel ‘Tom’ Villa (vigulín).
Grabáu nos Tutu Estudios de Corvera con producción de Sergio Rodríguez y con un diseñu -mesmo de la portada que de los cenciellos- fechu por Celia Nieto, Lluminaria ta formáu por cuatro temes que Marina Pangua foi presentando en declaraciones pa MUSICASTURIANA.COM. De ‘Foles Ermes‘ dixo «foi una lletra qu’escribí fai un tiempín y el cantar escoyímoslu como single porque foi’l que nos salió del corazón y el que nos pidía’l cuerpu d’ente tolos qu’había». Esti tema con un ritmu sele cercanu al indie y la canción autor tamién contién l’entemediu musical ‘La Espluma’, obra de la vigulinera Celia Nieto.
‘Lluminaria‘ ye’l cantar que da nome al EP; una composición propia con ritmu de muñeira; y, como desplica la Pangua, «xuega col contraste ente la tiniebla, lo escuro, lo que manca, lo que duel, lo que da mieu inclusu… y la lluminaria como esa lluz misteriosa de daqué que tovía nun se conoz, pero que ta por venir y que va ser bueno». «La música ye pa baillar. Escoyimos un ritmu de muñeira y entós quedó un tema bien animáu», comenta sobre esti cantar d’autoría propia qu’inclúi tamién una melodía tradicional, ‘El trepeletré’.
‘Vuelta‘ ye’l tema más pop y nél cunten cola collaboración al baxu de Sergio Rodríguez y de Luis Senén Fernández a la batería. «Ye’l primer cantar qu’arreglemos al xuntanos, asina qu’a nós suénanos al nuestru entamu. Y eso que, precisamente por ser el primeru, ye ún de los que más se foi tresformando, amoldándose al nuesu camín», desplica Marina Pangua sobre un cantar que con «sonoridá diferente» que «fala d’un momentu vital de cambéu: la efervescencia que produz venir de tarrén desconocío, lo reconfortante de volver y la certeza de que lo que foi importante, nunca termina».
L’EP zárralu ‘Siempre llibre‘, una tonada renovada qu’asina presenta Pangua: «naz d’una tonada clásica asturiana que se llama ‘Siempre sola’ a la que-y cambié la lletra orixinal porque yera tremendamente desoladora». Asina ye como conviertieron esta pieza notra «empoderadora, esperanzadora y feminista» que musicalmente sustitúi los bordones de la gaita por copes de cristal y inclúi vigulinos que dan «un aire mui llixeru».
Siguir nel camín
La Ciudá nel Mar presentóse públicamente esti añu, pero la semiente d’esti cuartetu remóntase a 2019 cuando «Elías García y Diego Pangua ficieron d’alcagüetes nel Festival de Lorient» conversando cola cantante. «D’ehí surdió una primera formación», comenta Marina Pangua, añadiendo que «col pasu y el posu del tiempu, a la fin prendió con fuercia aquella semiente y tenemos la formación que buscábemos, cantares fechos con rixu y amor y munches ganes de facer música»
Amás de la so orixinalidá musical qu’entemez tradición, canción d’autor y indie-pop, la lliteratura ye otru de los pegollos de La Ciudá nel Mar y amuésenlo hasta nel nome, que «vien d’un poema d’Edgar Allan Poe: The City in the Sea«. Asina ye como la vocalista, percusionista y guitarrista desplica que «les lletres tán mui cuidaes», que creen «muncho na simbiosis de música y lliteratura» y, poro, dan «gran importancia al testu». Lluminaria ye un reflexu de too esto y l’adelantu de tol camín que’l cuartetu tien per delantre y pal que yá tán dando los próximos pasos.
