La Conseyería de Cultura, Política Llingüística y Deporte convocó ayeri les subvenciones pa la difusión, estudiu y puesta en valor del patrimoniu cultural asturianu, una llinia d’ayudes d’especial interés pa iniciatives venceyaes a la música tradicional, la tradición oral y el patrimoniu cultural inmaterial 
La convocatoria tien un presupuestu total de 140.000 euros, concede un máximu de 6.000 euros por proyectu y el plazu pa pidir estes ayudes -a traviés de la sede electrónica del Principáu -remata’l 27 de xineru. musicasturiana.com
Ayeri publicóse nel BOPA la convocatoria de subvenciones pa la difusión, estudiu y puesta en valor del patrimoniu cultural asturianu, una llinia d’ayudes d’especial interés pa iniciatives venceyaes a la música tradicional, la tradición oral y el patrimoniu cultural inmaterial. La convocatoria tien un presupuestu total de 140.000 euros, concede un máximu de 6.000 euros por proyectu y el plazu pa pidir estes ayudes -a traviés de la sede electrónica del Principáu -remata’l 27 de xineru.
Esta convocatoria de subvenciones que nació en 2021 tien cuatro llinies d’ayuda, diferenciaes según el tipu de beneficiarios y la naturaleza material o inmaterial de los proyectos. Nel ámbitu que más afecta a la música asturiana, destaquen les llinies 3 y 4, destinaes a proyectos de patrimoniu cultural inmaterial y archivos de tradición oral. La llinia 3 ye pa entidaes ensin ánimu de llucru y particulares y la llinia 4 pa empreses.
Tal y como recueyen les bases d’estes ayudes, los proyectos subvencionables han tar centraos na difusión, investigación, promoción y tresmisión del patrimoniu cultural asturianu, incluyendo iniciatives que fomenten el conocimientu social de los valores culturales venceyaos a la tradición oral, la música popular, la recoyida d’archivos sonoros o la conservación d’espresiones culturales inmateriales. El plazu d’execución podrá estendese hasta’l 31 de xineru de 2027, fecha llende tamién pa la xustificación de les ayudes.
Solicitú
El 27 de xineru remata’l plazu pa pidir estes ayudes. Na sede electrónica del Principáu ta publicada la fueya de serviciu: códigu AYUD0357T01 pa la Llinia 1; AYUD0357T02 pa la Llinia 2; AYUD0357T03 pa la Llinia 3 y AYUD0357T04 pa la Llinia 4. Tamién pue alcontrase’l testu íntegru de la Resolución, información complementaria, el formulariu normalizáu de solicitú y la posibilidá d’iniciar electrónicamente la solicitú.
