La gaita asturiana lleva más d’un sieglu espardiéndose per tol mundu y estos últimos díes aportó al King Abdulaziz Center for World Culture – Ithra, un prestixosu espaciu cultural allugáu en Dhahran (Arabia Saudí) y construyíu penriba d’un pozu petrolíferu en desusu. Esti recintu acoyó les xornaes Spanish Days na que participaron distintes comunidaes culturales de la península ibérica y ellí aportaron el 19 de xineru una bandina tradicional formada polos músicos José Luis García, Nel Villanueva y Satur Vega -que formaríen Finxu, un proyectu musical nuevu- y el 28 de xineru diecisiete componentes de la Banda Gaites Villa de Xixón. Fixeron actuaciones tolos díes que congregaron a muncho públicu –18.000 persones nel actu de clausura-, punxeron a la xente a baillar pesie a les torgues, fixeron amistaes, axuntaron a asturianos emigraos, acompañólos un saudí asturianu… Falamos con José Luis García, director de Villa de Xixón, p’afondar nesta esperiencia internacional nun añu nel que tamién tuvieron en Nueva York y Osaka.

Participastis n’Ihtra nos Spanish Days. ¿Qué otros territorios tuvieron presentes?

Compartíamos escenariu con xente del flamencu. Había un tributo Paco de Lucía, por exemplo, zarzuela, Cabezudos… tamién había música de Cuenca. Había una representación de toles comunidaes autónomes, anque nel escenariu principal tábemos namás les propuestes de flamenco y nós.

¿Cómo foi l’acoyida del públicu?

Normalmente, por actuación, había una media de 450 persones más o menos. Entamó un poquiñín floxu porque nun acababen d’ubicar la cuestión de la gaita, pero la cosa foi animándose. Teníemos a Nel ehí que llevaba la voz cantante en cuantes al tema de les presentaciones. Yo amás deprendí un poco d’árabe, dalgunes frases que nos diben diciendo… Entamamos a interaccionar mui fácil cola xente que nos venía a ver.

Hubo una cosa que nos llamó muncho l’atención. Nos primeros bolos nun podíes percibir pa nada les sensaciones na xente porque había munchísimes muyeres y toes col burka, cola cara tapada. Veíes mover les manes dalgo, aplaudir, aplaudíen mui sele. Llueu entamamos a xugar con ellos pa que llevasen el ritmu de les muñeires, el saltón y demás. Fuimos quien a sacalos a baillar y costónos muncho cola organización porque tol tema del contactu yera super complexu; de fechu, pararon un par de veces al públicu porque había unos controles, unes policíes relixoses y paráron-yos. Nun-yos dexaron baillar con nós la danza de Santana y eso dionos pena porque la idea que teníemos yera la d’interaccionar.

«Nos primeros bolos nun podíes percibir pa nada les sensaciones na xente, pero llueu fuimos quien a sacalos a baillar, anque costónos muncho cola organización porque tol tema del contactu yera super complexu; de fechu, pararon un par de veces al públicu porque había unos controles, unes policíes relixoses y paráron-yos»

¿Qué temes tocastis?

Empezamos cola Marcha de Brañes de Xuacu Amieva. Tocamos tamién unos agarraos que funcionaben mui bien. Los tiempos binarios yera dalgo que-yos encaxaba perbién, como los ixuxús; gritos tradicionales nuestros que casaben muncho colo d’ellos en dalgunos momentos. Tamién la pandereta, qu’ellí tiénenla y úsenla munchísimo. Asina entamó a encaxar too y al segundu o tercer día yéremos el show que más xente tenía ellí esperando… y cuando aportó tola banda desbordóse porque entamaron a acabase los espacios na siella.

Lo que ficimos foi un pequeñu pasacáis cola banda cinco minutos enantes del show y llegábemos al set arrastrando yá a 200 o 300 persones detrás. Llueu, mentanto’l set, tocamos la danza de Santana, muñeires como Tormaleo y Carcarosa y cuando tocábemos tola banda la xente volvíase lloco, había una simbiosis.

¿Cómo foi l’actu de clausura del eventu?

Los componentes de la banda gaites llegaron el 28 xineru pa los ensayos xenerales de la ceremonia de clausura. Yera una ceremonia que taba organizada dende Madrid, a traviés de Mediapro y d’otra productora y llevaba munchísimu xuegu de lluces, de drones… Hubo una parte na que tocábemos nun altillo onde nos iluminaben… Y tuvo mui bien, había munchísima xente, fueron dos pases de 18.000 persones les que pasaron peles dos actuaciones.

«Los agarraos funcionaben mui bien; los tiempos binarios yera dalgo que-yos encaxaba perbién, como los ixuxús o la pandereta, qu’ellí tiénenla y úsenla munchísimo. Asina entamó a encaxar too y al segundu o tercer día yéremos el show que más xente tenía esperando»

Tocastis nel Ithra, un espaciu mui destacáu pa la cultura dientro d’esi país.

Ye un sitiu mui relevante n’Arabia, ye’l centru cultural más importante que tienen ellos ellí. Ye un edificiu modernista impresionante que ta construyíu recubiertu de tubos d’aluminiu y ye una alegoría al tema del petróleu. Ta xusto enriba d’un pozu petrolíferu que foi’l númberu ún y que yá nun usen más. Yo creo qu’intenten plasmar la riqueza que tienen gracies al petróleu, que ye una riqueza cultural tamién.

Nestos Spanish Days había esposiciones de toles comunidaes, muncho deporte con esposiciones de deportistes españoles, proyecciones de cine, teatru de títeres… La verdá que llevaron una imaxe d’España bastante curiosa, non namás del flamencu, anque ye verdá que’l flamencu rescamplaba penriba lo demás, pero nós abrimos espaciu no musical.

¿Qué balance facéis de la esperiencia?

La banda tuvo dende’l 28 al 31 y agora que yá llegamos toos a Asturies les sensaciones son mui buenes pela nuestra parte, porque’l respetu qu’había pa cola nuestra música, el respetu a les tradiciones, la curiosidá por saber y conocer d’ónde veníemos, que músiques tábemos tocando… sorprendiónos munchísimo. Regalábennos munchos detalles saudíes cuando baxábemos del escenariu, facíen milenta semeyes y son mui hospitalarios y súper agradecíos.

Quiciabes lo que más nos chocó foi nun poder ver toles cares de toles persones que diben a los shows, sobre too les muyeres, que taben tapecíes dafechu. Esa parte de nun permitir la interacción humana, como equí entandemos una nueche en danza o entendemos el baille tradicional… Foi una pena que nun pudiese haber esa comunicación física, pero’l tratu, el respetu y l’atención foi máxima; yo creo que de les actuaciones d’esti añu d’Estaos Xuníos, Xapón y Arabia Saudí, esta última foi la más destacada nesti sen.

«L’Ithra ye un edificiu modernista impresionante que ta construyíu recubiertu de tubos d’aluminiu y ye una alegoría al tema del petróleu. Ta xusto enriba d’un pozu petrolíferu que foi’l númberu ún y que yá nun usen más. Creo qu’intenten plasmar la riqueza que tienen gracies al petróleu, que ye una riqueza cultural tamién»

Esta esperiencia nueva sigue’l vuestru camín d’internacionalizar la cultura asturiana y festexar los 25 años de la banda.

Somos la banda gaites que más kilómetros fizo nel mundu y eso faite ver -y sobre manera sentir- que la música asturiana pue tar a l’altura de cualquier otra música, porque ensiguida supimos abrir espaciu y gananos a la xente, como ficimos en Xapón. Non too ye flamencu, non too ye sur, tamién hai una parte del norte de la península que tien que tar mui presente nesti tipu d’eventos. Creo que tamos buscando o faciendo por abrir un espaciu que va durar munchos años, porque equí faense coses mui interesantes y parezme importante que tean presentes n’eventos d’esti calter. Ye decir, que cuando dalguien conoza España, conózala entera, non namás una pequeña parte.

Que Villa de Xixón entrara nesti tipu de circuitos va ser un beneficiu pa toos. De fechu, gracies a esto d’Arabia Saudí y del éxitu que más o menos tuvimos ellí, tamos a puntu de zarrar más coses, porque gustó muncho la interacción y cómo nos adaptamos a les circunstancies. Y bueno, decir qu’esti tipu d’histories tán mui bien valoraes non namás pal currículum, sinón poles persones que van ver estos espectáculos. La xente qu’entraba nel Intrha buscaba conocer España y conocela dende dientro, y creo que lo algamamos ente tolos que tábemos.

«Somos la banda gaites que más kilómetros fizo nel mundu y eso faite ver -y sobre manera sentir- que la música asturiana pue tar a l’altura de cualquier otra música, porque enseguida supimos abrir espaciu y gananos a la xente, como ficimos en Xapón. Non too ye flamencu, nun too ye sur, tamién hai una parte del norte de la península que tien que tar mui presente nesti tipu d’eventos»

¿Qué anécdotes pues cuntar de la esperiencia?

Hubo una cosa que nos impresionó mucho. Había un saudí de 23 años, Saud llámase, que foi a venos dende l’entamu onde’l camerinu y díxonos «yo ye que soi asturianu»; y yo: «bueno, asturianu nun yes, nun te paeces muncho a los asturianos»; y él: «Yo soi asturianu. Tuvi dos meses d’Erasmus porque soi traductor d’español y escoyí Asturies pa facer les mis práctiques. Tuvi con una familia n’Uviéu dos meses y dos meses ye como si fuesen 20 años». Ye una frase esta última qu’usen muncho los saudíes.

Y Saud tuvo con nós tol viaxe. Enseñónos munches coses de la cultura saudí, de les tradiciones, de cómo faen pa casase, de cómo igüen los problemes… La diferencia cultural chocónos munchísimo a lo primero, pero gracies a Saud pudimos conocela mui a fondu. Costónos muncho despidinos d’él y y eso que los chavales de la banda namás tuvieron trés díes con él. Aprendió amás les canciones asturianes, la Xota del Corralín que tocamos acabó cantándola, vistióse d’asturianu… Él tamién conocía a José Ángel y María José Hevia, que tuvieren na embaxada saudí va tiempu nuna recepción y él fuera’l traductor. Tenemos pendiente que faiga una visita a Asturies, que naguo por que se materialice lo más pronto posible.

¿Amás del públicu saudí, hubo asturianos emigraos que fueron a los shows?

Sí. Vinieron a venos persones asturianes que taben trabayando n’Aramco, que ye la petrolera que financió tou esti proyectu, la más grande del mundu. Y tamién vinieron asturianos dende Bahrein, que conocíen a xente de la banda. Hubo media docena d’asturianos que vinieron a casi tolos pases que ficimos, veníen casi tolos díes y eso agradónos a esgaya a toos.

«Saud foi un rapaz saudí de 23 años que nos dixo ‘yo ye que soi asturianu’ ytuvo con nós tol viaxe. Costónos muncho despidinos d’él, aprendió amás les canciones asturianes, la Xota del Corralín que tocamos acabó cantándola, vistióse d’asturianu…»

Esta esperiencia supunxo’l nacimientu de Finxu. ¿Qué pues cuntar d’esti proyectu musical nuevu?

Ellí tuvimos tocando un tríu formáu por Nel Villanueva, Satur Vega y yo. Tuvimos que facer un show pequeñu de 20 minutos que dábemos dos vegaes al día. Llamámoslu Finxu y la idea que tenemos los trés ye la de facer un grupu de culto, diferente a lo qu’hai davezu nel panorama musical asturianu. Tampoco va ser una banda pa facer namás conciertos, sinón que ye un grupu que creo que va ser una migaya d’investigación. Tamos mui metíos nel tema bretón y gallegu y ellí tán faciéndose coses que nos atraen muncho a los trés y creo que la historia va dir per ehí; buscar dalgunos caminos alternativos y nón como lo que ficimos n’Arabia Saudí, que foi plasmar la tradición más pura que tenemos equí a traviés de la gaita. Queremos grabar daqué cosa y facer un repertoriu bastante anovador.

«Finxu formámoslu Nel Villanueva, Satur Vega y yo y tenemos pa idea de facer un grupu diferente a lo qu’hai anguaño nel panorama. Tamos mui metíos nel tema bretón y gallegu y ellí tán faciéndose coses que nos atraen muncho a los trés y creo que la historia va dir per ehí»

Gracias Arabia Saudí por acogernos y por todo lo vivido en el Ithra. Nos sentimos muy orgullosos de llevar un pedacito de Asturias tan lejos. Y gracias de corazón a quienes nos seguís y apoyáis siempre… esto también es por vosotros.

#villadexixon #vxenarabia