La cría d’aves de corrolada en llibertá vuelve tar dexada en toa Asturies. El Ministeriu d’Agricultura anula les restricciones pol gripe aviar qu’afectaben a los conceyos de Castropol, Corvera, Xixón, Gozón, Ribesella, Tapia de Casariego, A Veiga y Villaviciosa.
La cría d’aves de corrolada en llibertá vuelve tar dexada dende güei en toa Asturies, tres la publicación nel Boletín Oficial del Estáu (BOE) de la disposición del Ministeriu d’Agricultura que llevanta’l confinamientu d’esta especie en zones d’especial vixilancia. N’Asturies yeren ocho los conceyos con esta calificación: Castropol, Corvera d’Asturies, Xixón, Gozón, Ribesella, Tapia de Casariego, A Veiga y Villaviciosa.
El ministeriu yá anulara les restricciones aprobaes el pasáu 11 de payares para frenar la espansión d’esta enfermedá altamente infeiciosa, cola esceición d’estes árees especiales, que d’equí p’arriba yá van poder criar les sos aves en llibertá.
El fin d’estes llimitaciones en tol Principáu va dexar, amás de volver a entamar la cría nel esterior, celebrar certames, amueses o exhibiciones con aves cautives.
Sicasí, la Conseyería de Mediu Rural y Política Agraria encamienta amenorgar el contactu con aves monteses y los sos escrementos, evitar la manipulación d’animales muertos o enfermos y reforzar les midíes de bioseguridad nos gallineros.
