Autor SERGIO LLUNIK @sergio.llunik
Testu LETICIA SÁNCHEZ RUÍZ @letisaurus
La N 90 ye una alegoría visual sobro la turistificación que se ta viviendo Asturies y les sos consecuencies tanto na vivienda, la vida de barriu o nel contraste con que tamos viviendo col lema “Asturies Paraísu Natural” y el cuidu del mesmu.
La figura central, el mineru sobro’l paisaxe verde asturianu, representa a la mesma rexón inflixiéndose dañu coles sos propies manos: non solo hai villanos esternos, sinón un territoriu que reproduz sobro sí mesmu una nueva lóxica destructiva.
La so cara ensin cara, sustituyida per ventanes en llapaes, fala d’una identidá borrada y de viviendes baleraes; los candaos nel pechu remembren les caxes de llaves d’Airbnb; la bolsa de viaxe, al turista qu’ocupa lo qu’antes yera barriu; y los cartelos d’Arriéndase” n’enclaves históricos claven sobre’l paisaxe la idea d’un territoriu convertíu en productu.
Coles mesmes, el colax tiende un filo col pasáu: el picu, el mandil y la maquinaria ferruñosa a los pies recuerden el cayente de la minería asturiana, otra ferida yá esistente primero que llegara la turistificación. La sidra elevao sobre’l mirador del Fitu introduz una nota irónica, el símbolu cultural más reconocible amenorgáu a reclamu turísticu. Asina, la obra suxure que Asturies yá conoz el costu de ser esplotada, y que güei, con distintes ferramientes pero la mesma mecánica, vuelve pagalo.
- Sergio Llunik ye diseñador gráficu y director d’arte con más d’una década d’esperiencia, especialmente venceyáu a proyectos culturales y artísticos. A lo llargo de la so trayectoria trabayó con instituciones, feries y centros d’arte, según con festivales y entidaes del ámbitu musical y escénico. Collaboró con artistes, sellos discográficos y eventos musicales, amás de desenvolver trabayos pa diverses compañíes teatrales. Paralelamente, caltien una llínea de creación personal, participando en publicaciones colectives y proyectos propios como Corazón y Xelu.
- Leticia Sanchez, escribe noveles, fai periodismu y enseña narrativa teatru y ensayu
