Uviéu va acoyer los díes 26 y 27 de xunu de 2026 la segunda edición del Festival de Poesía Voces del Fornu, una cita que busca convertir la capital asturiana nun referente internacional de la creación poesía escénica contemporánea. Van ser poétiques d’Asturies, Galicia, Cataluña, Colombia y Chile.
Dirixíu pol escritor y poeta Miguel Rodríguez Monteavaro (@m.r.monteavaro) y patrocináu pola Fundación Municipal de Cultura d’Uviéu (@culturaoviedo), el festival une nel so cartel autores de distintos territorios y tradiciones lliteraries, apostando pola diversidá llingüística, la excelencia artística y l’alcuentru ente creadores.
Depués de la bona acoyida de la primer edición, Voces del Fornu (@vocesdelfornu) consolídase como un espaciu de diálogu y convivencia ente distintes formes d’entender la poesía, con presencia de propuestes n’asturianu, gallegu, catalán y castellanu. El proyectu naz col oxetivu de dar puxu a la profesión lliteraria, favorecer la conexón ente escritores y averar la poesía a públicos diversos.
- La programación va empezar el vienres 26 de xunu nel Teatru Filarmónica d’Uviéu. A les 19:30 hores va presentase Os nomes íntimos, un recital escénicu de poesía y música en gallegu protagonizáu por Samuel Merino (@pompa_e_boato) y Lucía Aldao (@lucialdao). A les 20:30 hores será’l turnu de Goigs poshumans, la propuesta interdisciplinar de la poeta catalana Anna Pantinat (@anna_pantinat) y el músicu Shoeg. La xornada va culminar a les 21:30 hores col recital-conciertu del cuartetu chilenu Emilia & Pablo (@emiliaypablomusic), conocíu pola so fusión de folclor llatinoamericanu, flamencu y artes escéniques.
- El sábadu 27 de xunu, a les 12:30 hores, el Salón de Té del Teatru Campoamor va acoyer un recital de poesía contemporánea conducíu por Miguel Rodríguez Monteavaro y nel que van participar les poetes Ruth Llana (@r.llana, poeta de La Pola Siero que trabaya como profesora universitaria n’Estaos Uníos), Andrea Cote Botero (@andreacote27, Premiu Casa de América de Poesía y profesora universitaria n’Estaos Uníos) y Berta Piñán (@bertapinan, Premiu Nacional de Lliteratura Asturiana de 2026).
