Caricós crea los «folki-paseos» p’axuntar rutes de montaña y música folk. L’asociación entama la primer actividá d’esti calter esti domingu 14 en Quirós cola Ruta los Molinos de Corroriu y una sesión folk en La Pimpana.
Esti 14 de xunu tais invitaos al primer folkipaseu de Caricós!! Acompañainos a esfrutar de música y naturaleza nel conceyu de Quirós. 🌿 Ruta de los Molinos de Corroriu /📍 Salida: Albergue d’Arroxo / 🕚 11:00 h. Dempués del paseu, caún podrá organizase como meyor-y venga pa xintar ya descansar un poquitín nel prestosu entornu del embalse de Valdemurio. Asina recuperaremos fuercies pa la sesión folk que tendrá llugar na Pimpana a les 17:30 aprox.
Esti eventu ye de baldre, ya totalmente llibre: Si nun t’ apetez caminar, ven solo pa la sesión, o si nun toques nengún instrumentu pero te presta acercate, acompáñanos! Vémonos!
Va facer un añu que se presentó públicamente Caricós, una asociación de xente mozo pa que trabaya pa dinamizar la escena folk y de música tradicional asturiana. A lo llargo de tou esti tiempu desendolcaron delles actividaes y tán acabante d’anunciar una nueva: los folki-paseos, iniciativa qu’entemez rutes de montaña y música folk y qu’esti domingu 14 celebra en Quirós la so primer esperiencia.
A les once la mañana entama esta xornada na que tola xente que quiera participar pue facer la Ruta los Molinos de Corroriu, con salida del albergue d’Arroxo. La estaya musical arranca aproximadamente a les 17.30h nel chigre-tienda La Pimpana Quirós, onde va facese una sesión folk. Pente medies, la organización anuncia que «caún podrá organizase como meyor-y venga pa xintar ya descansar un poquitín nel prestosu entornu del embalse de Valdemurio«.
«Esti eventu ye de baldre, ya totalmente llibre: Si nun t’ apetez caminar, ven solo pa la sesión, o si nun toques nengún instrumentu pero te presta acercate, acompáñanos», anuncien tamién dende Caricós p’animar a participar al públicu a esta xornada de naturaleza y música asturiana.
