Yá ta en toles plataformes musicales ‘CN-10 ‘, el primer cenciellu de Draque, tríu de folk de cámara formáu por Celia Corrales (voz y pandereta), Celia Nieto (vigulín) y Julio Rodríguez (bouzuki) 
El tema ta formáu polos cantares tradicionales ‘Bele-Bele’ y ‘Los Pol.los’ y rescampla la instrumentación amás del componente d’improvisación. Musicasturiana.com
Foi en 2021 cuando Pepín de Muñalén y Xel Pereda xuntaron pa participar nel Ciclu de Folk de Cámara Ígor Medio de Xixón a Celia Corrales (voz y pandereta), Celia Nieto (vigulín) y Julio Rodríguez (bouzuki); daquella, trés nomes prácticamente desconocíos de la escena musical asturiana. D’entós p’acá, foron incorporándose a otros destacaos grupos (Corquiéu, Llan de Cubel, Entós, La Ciudá nel Mar…), ensin desdexar Draque, el tríu que nació naquella xuntanza. Pasaron cinco años d’un camín sele, pero firme y constante, d’ensayos, de conciertos nos que defenderon con xeitu la so propuesta… Faltaba que pasaren pel estudiu grabación pa grabar temes del so repertoriu y güei acabó la espera; yá ta disponible en toles plataformes musicales el so primer cenciellu: ‘CN-10 (Bele-bele & Pol.los)’. Celia Corrales cunta los detalles sobre esti cantar.
¿Qué pue sentise nesti cantar?
Esti tema ta compuestu en realidá por dos cantares del occidente d’Asturies, el ‘Bele-bele’ (L.larón) y ‘Los Pol.los’ (El Vau). Estos cantares tradicionales popularizáronse nes xuntances pal baille como la Nueche en Danza. Garramos estos temes porque paeciamos que les tonalidaes menores daben xuegu pa crear coses interesantes. Esti set yera la nota discordante nel nuesu repertoriu, y nello vimos potencial p’algamar un soníu propiu.
¿Cómo foi’l procesu de creación?
El procesu creativu foi mui interesante, partimos d’una rueda d’acordes que Julio fizo al bouzouki y “las Celias” improvisamos sobre esto. Repetimos el tema decenes de veces mientres lu grabábemos pa ver qué salía d’ehí, y foi cuando vimos qu’esi puntu d’improvisación y conversación ente los trés yera lo que necesitaba. Creemos qu’eso ye lo que más destaca en ‘CN-10’, la conversación y complicidá ente los trés; improvisamos pero nos entendemos.
«Creemos que lo que más destaca en ‘CN-10’ ye la conversación y complicidá ente los trés; improvisamos pero nos entendemos»
La instrumentación va más allá de la pandereta, violín y bouzuki a la que nos tenéis avezaos. ¿Qué pues cuntar d’ello?
Al facer la maqueta fuimos llanzándonos a meter el baxu pedal, los coros, varios bouzoukis, etc. Y por supuesto, al llegar al estudiu pidimos-y a Sergio Tutu qu’incluyera’l baxu. Tamos mui agradecíos, porque fizo un trabayu escepcional que punxo la guinda al pastel. Creo que ye’l resultáu de tener munches idees y poco tiempu pa plasmales, porque yera’l nuestru primer tema y l’únicu que dibemos espublizar pel momentu. Si entamáremos esti procesu cola intención de facer un discu de primeres, creo seríemos más comedíos.
¿Por qué esi títulu, ‘CN-10’?
Nel entamu pensáremos notru nome, la verdá que nun ye’l nuestru fuerte poner títulu a los cantares, pero vimos qu’había varios temes de reguetón con esti títulu y nun nos parecía una bona estratexa de marketing hahaha. Contactamos con Ambás, siempre dispuestu a echar un gabitu, pa que mos diera información de los temes que componen ‘CN-10’, y gustábanos tirar por daqué rellacionao cola zona de L.larón. Como la informante, María, yera de La Viel.la pero recoyeron el ‘Bele bele’ en L.larón, paeciónos que la carretera que xunía dambos pueblos yera una idea guapa y cenciella. Amás, si sigues per ehí, llegues a El Vau, pueblu nel qu’Ambás y Ramsés (ATOAM) recoyeron el segundu tema, ‘Los Pol.los’, a Josefa.
«Como la informante, María, yera de La Viel.la pero recoyeron el ‘Bele bele’ en L.larón, paeciónos que la carretera que xunía dambos pueblos yera una idea guapa y cenciella. Amás, si sigues per ehí, llegues a El Vau, pueblu nel qu’Ambás y Ramsés recoyeron el segundu tema, ‘Los Pol.los’, a Josefa»
Destaca tamién la portada, ¿Quién la fizo y qué busca reflexar?
Teníemos claro que la portada tenía que vese fecha a mano y preferiblemente que polo menos simulara tar fecha con óleu. Con una lluvia d’idees fuimos dándo-y forma y Julio, el nuestru bouzouki, llevola “al papel”. Nun quier méritos, pero lo merez.
¿Qué balance facéis del procesu de grabación?
Creo que reafirmó que Draque ye un proyectu que sentimos como propiu, que queremos madurar y que yá tien un soníu bastante representativu de lo que somos. Amás de lo que yá sabíemos, que los trés nos entendemos bien y, como amás de compañeros de proyectu somos collacios, tenemos la confianza necesaria pa ser claros cola nuestra opinión y quedar conformes col trabayu colectivu.
«Tenemos qu’agradecer a Pepín de Muñalén y Xel Pereda, que nos xuntaren nel añu 2021 siendo trés desconocíos, porque esti proyectu dionos -y esperemos que siga dando- grandes anécdotes y allegríes, amás de lo muncho que deprendimos pol camín»
¿Qué espectatives tenéis con esti cenciellu?
Les espectatives son tan cencielles como dexar pa la posteridá lo que ficimos xuntos, porque tamos arguyosos del avance y del nuestru soníu. De paso, si a la xente presta-y y nos dan la oportunidá de tocar más en directo, porque nos encanta compartilo col públicu, estupendo. A la fin, toos queremos que’l nuesu trabayu se reconoza.
¿Qué más queréis destacar agora que ‘CN-10’ yá ye una realidá?
Tenemos qu’agradecer a Pepín de Muñalén y Xel Pereda, que nos xuntaren nel añu 2021 siendo trés desconocíos, porque esti proyectu dionos -y esperemos que siga dando- grandes anécdotes y allegríes, amás de lo muncho que deprendimos pel camín. Tamién a Ambás y Ramsés, pol llabor y la xenerosidá y el ciñu col que comparten el so trabayu. Y, por supuesto, a tola xente que sofita esti grupu y insistió en que grabáramos. Esperamos qu’esti tema seya el primeru de munchos.
