La ciudá nel mar asoleyen ‘Les señes del agua’, l’adelantu del so primer discu. El tema amuesa la evolución de la banda indie-folk, con un soníu más eléctricu y contundente, amás de la incorporación de baxu y batería. Musicasturiana.com
¿Qué pue sentise nesti cantar en cuantes a música y lletres?
Ye ún de los cantares más elocuentes del discu. Quiximos da-y una obertura épica a esti tema, que ye a su vez el qu’arranca l’álbum que vamos asoleyar n’ochobre. ‘Les señes del agua’ son una llamada a nun perder la nuestra esencia, a saber imponese anque venga galerna. El títulu d’esti single inspirónoslu un versu de la poeta Lourdes Álvarez.
Nesti tema hai un cambiu de soníu, más eléctricu, contundente y cola incorporación d’instrumentación nueva. ¿Cuáles son los cambios que ficistis, por qué y qué balance facéis del resultáu?
Teníemos mui claro que nel nuestru discu queríemos esperimentar cola sonoridá y equí amosámoslo: tenemos una cierta orquestalidá reinventada nel entamu, soníu más electrónicu que nos anteriores temes que sacamos al meter programaciones, detalle de pedal steel… xunto a una sonoridá que yá va siendo bien nuestra.
«‘Les señes del agua’ son una llamada a nun perder la nuestra esencia, a saber imponese anque venga galerna. Tamién queríemos esperimentar cola sonoridá y equí amosámoslo: tenemos una cierta orquestalidá reinventada nel entamu, soníu más electrónicu que nos anteriores temesal meter programaciones, detalle de pedal steel…»
Ye’l primer cenciellu del discu que vais sacar n’ochobre. ¿Vais siguir per esti camín sonoru o va ser a metá ente’l primer EP y esto nuevo? Si pues avanzar daqué de lo que vais presentar…
L’álbum ta formáu por doce temes que son la carta de presentación de La ciudá nel mar. Esta Atlántida asturiana que llevantamos con cantares: lo que la mar lleva, lo que la tierra guarda. Nel procesu de grabación trabayamos estrechamente col nuestru productor, Sergio Rodríguez «Tutu» y garramos dos polizones nuevos: Olaya Llucía -que foi la nuestra asistente de soníu y agora tamién baxista- y Álvaro Martín Hierro -percusionista-.
La portada ta fecha pol ilustrador cordobés Borja Cámara; ¿qué pues cuntar d’ello?
La preciosidá de portada ye obra del ilustrador cordobés Borja Cámara, a quien conocimos pol trabayu que fizo pal diseñu del discu Toda la vida, un día, de la gran Silvia Pérez Cruz, col qu’algamó’l premiu al Meyor Diseñu nos Premios de l’Academia de la Música d’España nel añu 2024. Ye un suañu fechu realidá tenelu colaborando agora aportando’l so arte al nuestru trabayu.
«Pa setiembre sacaremos otru adelantu nuevu del discu y volveremos arrancar l’actividá en directu. Como toi ta a puntu de ser madre per segunda vez, nun vamos facer directos esti branu y tamos volcaos na ellaboración del discu. Asina que vamos garrar la seronda con fuercia:»
Yá lleváis más d’un añu de camín andáu. ¿Qué balance facéis de la trayectoria?
Llevamos poco más d’un añu de camín andáu dende que sacamos ‘Foles ermes’ a la lluz y cada día que pasa tenemos más gana de siguir. Pa setiembre sacaremos otru adelantu nuevu del discu y volveremos arrancar l’actividá en directu. Como toi ta a puntu de ser madre per segunda vez, nun vamos facer directos esti branu y tamos volcaos na ellaboración del discu. Asina que vamos garrar la seronda con fuercia: yá tamos zarrando feches de conciertos, preparando la presentación del discu per tolo alto…
Imaxe: De semeya en semeya
