La comunidá súmise al homenaxe a Francisco Ibáñez cola esposición ‘La ciencia de Mortadelo y Filemón’, n’Avilés. El conseyeru de Ciencia, Borja Sánchez, destaca esti tipu d’iniciatives como una vía para averar la investigación a la ciudadanía y fomentar les vocaciones científiques ente los mozos. RTPA / Actualidá
El conseyeru de Ciencia, Industria y Empléu, Borja Sánchez, participó na inauguración de l’amuesa, xuntu cola alcaldesa d’Avilés, Mariví Monteserín; la delegada del CSIC n’Asturies, María Fernández; la directora de FICYT, Mercedes Díaz; y la fía del autor, Nuria Ibáñez.
El proyectu propón un percorríu visual y temático al traviés de portaes publicaes ente 1975 y 2018 que s’estremen en cinco secciones. L’amuesa representa una oportunidá pa conectar la conocencia científica con públicos diversos por aciu l’humor, la creatividá y la cultura popular, utilizando l’universu de Francisco Ibáñez como ferramienta de divulgación y reflexón sobro los grandes retos científicos y tecnolóxicos del nuesu tiempu.
El conseyeru de Ciencia destacó la iniciativa, na que collabora la Unidá de Cultura Científica ya Innovación de FICYT, como una vía p’averar la ciencia a la ciudadanía. Esti tipu d’actividaes, destacó Borja Sánchez, refuercen l’apueste del Gobiernu del Principáu pol fomentu de les vocaciones científiques.
Bacterio, Mortadelo y Filemón viaxaron dende la T.I.A a Avilés. Hasta’l 30 de setiembre, el Muséu d’Historia Urbana acoyerá ‘La ciencia de Mortadelo y Filemón’, una esposición que busca facer un homenaxe a la obra de Francisco Ibáñez.
Al traviés de 39 portaes, dixebraes en cinco secciones, la esposición propón facer un viaxe per munchos de los momentos que marcaron la historia d’España. Siempres, eso sí, con un fuerte tonu humorísticu y satíricu.
Década traes década, y númberu tres númberu, Mortadelo y Filemón contribuyeron a averar el mundu de la ciencia al de la cultura.
Una obra qu’inspiró a munchos a persiguir carreres científiques.
Dos años dempués de la so muerte, los personaxes ficticios de Francisco Ibáñez siguen más vivos que nunca nes sos obres y na sociedá. Toa una herencia que la familia del artista prefier dexar intacta pa que siga falando por sí mesma.
