El proyectu nuevu Xe da Silva asoleya’l so primer tema y videoclip, ‘Ensin nome’. La canción d’autor y el pop alternativu entemécense na primer amuesa d’una propuesta musical que lleva años cocinándose dende l’anonimatu.
«Entamamos. Soi Xe da Silva y faigo cantares n’asturianu». Con eses pallabres presentóse la selmana pasada a traviés de les redes sociales Xe da Silva, un proyectu musical nuevu que ta acabate de llanzar el so primer tema y videoclip ‘Ensin nome’. Nél, pue sentise un cantar con influencies de la canción d’autor, del pop, del indie, del folk anglosaxón y con pesu lliterariu na lletra. Acompáñalu n’imáxenes un videoclip caseru grabáu per Xixón el día de San Xuan y nun trayectu de tren. Pero, ¿quién ta detrás d’esti proyectu?.
«Xe da Silva son los cantares. Quien tea detrás tien poca importancia, o polo menos ye irrelevante pa la música, que ye lo que nos importa de verdá», desplica la persona que respuende a esti nome artísticu. Nesti sen, la so intención ye clara: «Nun hai una voluntá nin una intención de nengún tipu más qu’escribir canciones y cantales. Son cantares n’asturianu nun estilu nel que nun se suel sentir la nuesa llingua«, añade’l músicu esclariando amás qu’esti proyectu «lleva cociendo bien d’años pero que hasta agora nun cuadró, polo que fuere, grabar nada o tratalu como un proyectu con capacidá d’amosar al públicu».
El so primer cantar, ‘Ensin nome’, ye la primer amuesa de Xe da Silva. Preséntalu como «un tema enforma pop, un pelín escuru pola temática, pero con cierta lluz; espero. Fala de tar perdíu na vida, pero de qu’a vegaes al perdenos alcontramos los meyores llugares«. Al rodiu la so propuesta musical en xeneral desplica que ta formada por «cantares folk nel sentíu ‘cantautor’ de la pallabra. Queremos cuidar les lletres pero ensin pasanos d’intensos… nun sé, igual meyor vais decidiendo vos según lo sintáis. Lo que si nos presta ye faer les coses d’una forma lo más artesanal posible, nestos tiempos d’IA, autotune y too súper perfecto y super pulío».
A la entruga de si va haber más llanzamientos nun futuru respuende que «too depende de l’acoyida que tenga’l proyectu. Pero temes pa dir desendolcando’l proyectu tenemos enforma«. Pel momentu pue sentise esti ‘Ensin nome’ y el so soníu que sigue llevando a la música n’asturianu per caminos per onde nun transita davezu.
