El Repunante Paisanón, un nuevu superhéroe que llucha contra’l mal n’Asturies. La Voz
El personaxe, lleváu al cómic por Héctor Fernández Gómez, ye un mineru prexubiláu que tien el so xoril nel pozu Barredo y que llucha contra los enemigos de la sidra o los narcotraficantes.
Los malvaos d’Asturies tienen razones más qu’abondes para tar esmolecíos. Porque en septiembre llega El Repunante Paisanón, un superhéroe cien per cien asturianu que llucha contra los enemigos de la sidra, los narcotraficantes y tolos malos que se-y pongan per delantre. Va ser en formatu de cómic, nacíu de la imaxinación d’Héctor Fernández Gómez, mierense afincáu en Tapia de Casariego que quixo faer una síntesis de los personaxes del Marvel o DC cola historieta europea, con una marcada identidá asturiana.
¿Pero quién ye El Repunante Paisanón? El so nome real ye Colás Castañón, ye mineru prexubiláu y tien el so xoril nel pozu Barredo, de Mieres. Dende ende dirixe les sos operaciones nes que los malos siempres acaben mal paraos. ¿Y por qué un prexubiláu? «Tenía que ser un superhéroe asturianu, y dixi, si esto por un casual pudiera ser real tendría que ser una persona que tien más o menos la vida solucionada, que tien tiempu y dineru, y un prexubiláu tien independencia económica y el físicu inda para ello», esplica l’autor .
El nome del protagonista herieda esi enclín al axetivu hiperbólicu de los cómics clásicos. «Foi por evocación a los nomes de los superhéroes de Marvel como L’Estelante Spiderman, L’Increíble Hulk, El Poderosu Thor, y al empar quería da-y el puntu risible asturianu», señala Héctor Fernández. Embaraxara otros axetivos como «charrán», «babayu» o «carapijo» pero nun s’afaíen a la personalidá del protagonista. El que más cuadraba colo que quería yera «repunante», ese axetivu asturianu tan difícil de traducir.
Esta ye la primer vegada qu’Héctor Fernández Gómez decide a publicar, anque lleva dibuxando desque yera un neñu. «Llevo tola vida; dende pequeñu, en cuenta de xugar a la consola taba dibuxando tol día; a la d’estudiar, ponía una fueya debaxo del llibru, llevantaba y siguía dibuxando», rellata. De primeres, dibuxaba sobremanera manga. «De pequeñu gustábenme enforma Dragonball y Caballeros del Zodiacu, y dempués fueron les películes y la serie animada de Batman, y Spiderman». Entós, al llegar la pandemia, como tenía más tiempu para pensar y dibuxar, empezó a plantegase faer daqué para publicar. «Vi que la manga taba enchíu, y el cómic d’Estaos Xuníos, tamién; propunxi entós faer unu amiestu, con un estilu americanu pero les cares tirando a la caricatura, más européu, y humorísticu».
La resultancia ye esi héroe fuerte y poderosu, con una montera picona perfectamente integrada na so supertraje, del que yá tien feches munches aventures. Dalgunes yá dibuxaes, otres afilvanaes, otres guionizaes. El primer arcu argumental, que los sos cuatro primeru cuadiernos van salir a partir de setiembre, tien como protagonista a la sidra. El superhéroe ve qu’empiecen a apaecer nes pumaraes asturianes más mazanes podres y con viermes de lo que sería natural, y tamién hai problemes nos llagares, y a partir d’ende desenvuélvese una trama qu’implica situaciones y personaxes que nun se pueden desvelar equí. «El protagonista va atopando pistes per acá y per allá y nel númberu cuatro yá s’afaya lo qu’hai». Y el próximu arcu argumental, que yá tien bien avanzáu, va dedicalu al narcotráficu.
La calidá de los dibuxos, dalgunes de que les sos amueses puen vese yá nes redes sociales, ye indiscutible. Beben de los cómics clásicos de superhéroes pero ensin quedase n’una simple imitación de les sos formes. Héctor Fernández Gómez quixo da-y el so sellu personal, y decidióse por ese camino dempués de da-y munches vueltes: «De primeres pensé n’otru estilu, más d’historieta risible típica d’España, como Mortadelo y Filemón, pero refugalo». Porque quería que fuera un superhéroe de verdá, coles sos singularidaes, y cree que l’estilu qu’escoyó finalmente ye’l que más s’afai a lo que buscaba. Sía que non, ta claru qu’esfruta enforma colo que fai, y que les hores que dedica a faer el guion, componer y dibuxar siempres merecen la pena. Celebra, eso sí, toos les meyores tecnolóxiques qu’hubo nos últimos tiempos. «Les tablets gráfiques y tolo qu’hai agora déxenme faer esto yo solu; antes nun lo hubiera podíu faer; lo qu’agora me lleva un día llevárame bien de tiempu, y amás precisaría’l trabayu d’otra xente; güei puedo faelo yo solu, y anque lleva muncho trabayu, puedes acabar una páxina bastante rápido», sostien.
El mierense va presentar oficialmente’l cómic en Tapia de Casariego, una localidá que la acueye dende fai 8 años onde asegura que siempres atopó muncho sofitu. Va ser el día 20 d’agostu a los ocho y media de la tarde na Casa de Cultura. Y los cómics podrán mercase en tiendes especializaes d’Asturies. Yá tien axustada la so distribución en llibreríes d’Uviéu, Xixón, Avilés y Mieres, que van facilitar que, a partir de setiembre, Asturies sume al so ricu imaxinariu un personaxe más: El Repunante Paisanón.
