Cultura garantiza les visites de veranu a la cueva de La Lluera cola creación d’una plaza específica de guarda-guía. Hasta’l 30 de setiembre. De miércoles a domingu. Grupos d’un máximu de 6 persones. Reserves: 695 466 282, de 15:00 a 17:00H de miércoles a domingu. Videu
Un xacimientu paleolíticu como pocos esisten y asitiáu n’Uviéu, anque solo abre mientres los meses de branu.
El Gobiernu d’Asturies va caltener esti serviciu hasta’l 30 de setiembre y, col fin de garantizar l’accesu públicu, la conseyería creó una plaza específica de guarda-guía para l’enclave cultural, «una midida que garantiza la continuidá de l’apertura braniza y refuerza tantu’l caltenimientu del abrigu como l’atención a quien lo visiten». Asina lo esplicó, mientres la mañana d’esti vienres, la conseyera del ramu, Vanessa Gutiérrez, mientres una visita a la cueva.
«Retomamos les visites a esta cueva de La Lluera, que ye absolutamente escepcional y que ye unu de los principales xacimientos d’esti tipu posiblemente nel mundu polos grabaos que tien y pol so caltenimientu», afirmó Gutiérrez, para añedir de siguío que «nesta cueva creemos agora una plaza, que ye la que ta ocupando Manuel (al pie de ella mientres la visita), precisamente para dotar d’estabilidá les visites a ella y ayudar al so caltenimientu y na so vixilancia». Tamién esplicó la conseyera que’l Principáu, de forma previa, llevó a cabu una serie d’actuaciones na zona para ameyorar l’accesibilidá nos caminos d’accesu y rozóse la redolada.
Vanessa Gutiérrez: «Convidamos a que vengan esfrutar d’estes visites porque ye estraordinariu y poder veles acompañáu de daquién como Manuel, que va ayudar a descifrar esos restos», destacando de siguío que La Lluera «yá ta protexida y tien la máxima reconocencia y la máxima protección llegal n’Asturies y n’España. Porque lo merez pol so valor y tenemos que siguir trabayando en fomentar la so conocencia, la investigación, l’espardimientu y el so preservación».
Los percorríos tienen una duración averada de 45 minutos y realícense de miércoles a domingu, con un pase cada hora, ente les 10 y les 15 hores. Los grupos tán llindaos a un máximu de seis persones per visita, una fórmula que favorez xuna meyor esperiencia pal públicu y contribúi, coles mesmes, a caltener esti espaciu patrimonial, defende l’Executivu. Les reserves, garré mesmu, pueden realizase, de miércoles a domingu, ente les 15 y les 17 hores, al traviés del teléfonu 695 466 282.
Arte rupestre paleolíticu Asitiada nel conceyu d’Uviéu, La Lluera constitúi unu de los conxuntos d’arte rupestre paleolíticu más importantes del norte peninsular. El xacimientu caltien un estraordinariu repertoriu de grabaos de uros, caballos, bisontes, venaos y otres figures animales que converten esti santuariu al campu nuna referencia pal estudiu del arte paleolítico cantábricu. Les investigaciones desenvueltes dende finales de la década de 1970 dexaron documentar unu de los conxuntos de grabaos esteriores más sobresalientes d’Europa occidental.
P’aportar al abelugu de La Lluera encamiéntase dexar el vehículu nel aparcamientu asitiáu al pie de la ilesia de Priorio. Dende ellí parte un percorríu piatonal d’aprosimao un kilómetru hasta’l xacimientu, polo que s’aconseya allegar con calzáu fayadizo pa realizar el trayectu con comodidá y seguridá.
