Alba Menéndez (L’Entregu, 1989) ye cantante y panderetera. El venceyu a la tradición musical asturiana tienlu dende neña, onde deprendió con so güela cantares tradicionales de Cuideiru, conceyu del que vien tola so familia. Sicasí, la emigración llaboral pa trabayar na mina fixo que la nacieren na Cuenca’l Nalón y que viviera ente Piñera y L’Entregu, onde deprendió la importancia de los movimientos sociales y de la revindicación de la xusticia social. Llueu de deprender de forma autodidacta a cantar y tocar, dempués del andanciu entró a formar parte del grupu 6 Riales, col que collaboró con una montonera artistes del país y percorrió escenarios de dientro y fuera d’Asturies. Tres de dexar esta formación, hai unos meses presentó’ so proyectu musical nuevu: L.lariega, un tríu centráu nel repertoriu de tradición oral del occidente asturianu, volviendo asina a los sos raigaños.
Con ella siguimos cola estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Un discu qu’enxamás canses de sentir.
Son munchos y toos n’asturianu pero si teo que decir ún que lleva acompañándome tola vida y marcándome dende moza ye Un tiempu meyor de Llan de Cubel.
Si tuvieres que formar parte d’otru proyectu musical, ¿cuál sería?
Uff que díficil, porque nun me gusta encasiyame namás nun llugar; soy culu inquietu. Pero qué se yo; de repente nun grupu folk asturianu cañeru como Brenga Astur… dalgún grupu nuevu cola mesma llinia de Dixebra, Skama la Rede o La Tarrancha o una bandina de cai, porque soy yo muncho de tar a pie de barra nun chigre o en prau cantando cola xente ya compartiendo col pueblu.
«Quixera qu’en tolos conceyos fueran conscientes de la riqueza que tienen na so casa y nos sos pueblos, pa que d’ehí puxaran por ello ya sintiéranse arguyosos d’ello trabayando a nivel interxeneracional pa que que nun se pierda»
De los cantares que compusisti o interpretes, ¿cuál ye’l to preferíu?
Pues mira nunca me dio pola composición; ya una cosa a esplorar, sacantes dalguna cuarteta, pero de los que interpreto son muchos. Encántame sentir les fontes sonores o a la mesma xente que tovía lo tien vivo ya interiorízalo porque dende ehí fáime conectar con muncha xente’l país.
¿Cuándo foi la primer vez que xubisti a un escenariu y que pasó enantes, durante y depués?
Uuff ni me acuerdo jajaja. Tola mio vida tuvi en munchos movimientos sociales ya culturales que me llevaron a facer teatru, actuaciones de cai, munchos mercaos tradicionales, munches Nueches en Danza y munches folixes en praos y chigres. Pero si teo que decir ún yá a nivel profesional foi en Xixón coles mios compañeres de 6 Riales; dende ehí foi un non parar jaja.
¿Qué ye lo más inxusto de ser artista?
Bueno como tou tien la so cara B ta claro que yo personalmente lo que peor llevo ye la precariedá na que nos vemos sometíes, el poco reconocimientu qu’hai pa col trabayu qu’hai detrás en tolos aspectos.
«Confieso que soi mui de verbena. Criéme ente elles tolos branos en Cuideiru y nun ye que tea un grupu preferíu pero si qu’en llegando esta época pongo nel Spoty playlist Verbenera, eso enxamás falla»
Si fueres Conseyera de Cultura, ¿qué son les primeres coses que fadríes?
jajajaja buena pregunta, ocúrrensenme tantes contestaciones… pero cola que quedaria sobre manera ya por impulsar la cultura nos territorios a nivel pequeñu. Refiérome qu’en tolos conceyos fueran conscientes de la riqueza que tienen na so casa y nos sos pueblos, pa que d’ehí puxaran por ello ya sintiéranse arguyosos d’ello trabayando a nivel interxeneracional pa que que nun se pierda.
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Munchos sí, de los qu’agora son grandes amigues ya amigos. Pero si dalguien me marcó ya pude disfrutar ya emocioname ya identificame dafechu, esi grupu ya Tuenda ensin nenguna dulda.
«Al backstage convidaría a Mercedes Peón ya Mari Luz Cristóbal Caunedo. Encantaríame sentir de les sos propies voces los anicios y lo que-yos llevó a mangase nun escenariu»
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
jajajajajaja confieso que soi mui de verbena. Criéme ente elles tolos branos en Cuideiru y nun ye que tea un grupu preferíu pero si qu’en llegando esta época pongo nel Spoty playlist Verbenera, eso enxamás falla.
¿A qué personaxe públicu convidaríes a un conciertu tuyu, a pasar llueu pel backstage y pa qué?
Munchos y munches, pero si teo que decir unes diría Mercedes Peón ya Mari Luz Cristóbal Caunedo. Encantaríame sentir de les sos propies voces los anicios y lo que-yos llevó a mangase nun escenariu, aunque yá lo sabe tol mundu, pero sentilo d’elles sería lo máximo.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Pues mira toi pendiente d’acabar una llectura pa embarcame nel llibru d’Irene faza La tierra la gallina. Toi ansiosa por lleelu y de xuru sería bestial que pasase tolo que diz la entruga.
