Asturies madre y madrasca mientres xeneraciones vio partir a los sos fíos.
Toos, quiera que non, lleváronse consigo un cachu d’esta tierra.
Pero hai coses que nun caben na maleta.
El golor del mar.
L’arena pegada a los pies. El soníu de les foles llegando a la sablera a la fin d’una tarde de branu. La lluz d’agostu. Esi paisaxe que, de tanto velo, acaba formando parte d’ún mesmu.
Para Gemma y Laura esi llugar tien nome propiu: Rodiles.
Dos hermanes qu’un día fixeron les maletes y acabaron viviendo en países distintos. Dos vides construyíes llueñe d’Asturies, pero xuníes por una mesma memoria y por esa palabra tan nuesa que resulta difícil traducir del tou: la señardá, la morriña.
Porque cuando se ta llueñe échense de menos munches coses. La familia. La comida. Les conversaciones. L’agua, inclusive. Pero hai xuna ausencia que tien sabor a sal.
El mar.
Por eso cuando se vuelve, da igual que sía agostu y que la sablera tea llena. Da igual qu’haya sombrielles hasta onde algama la vista. Volver triar Rodiles sigue teniendo daqué de milagru. Como si mientres unos díes el tiempu decidiera devolvenos esactamente al llugar del que fuimos.
Esta ilustración naz d’esa memoria compartida.
- @gemma_palacio Gemma, ilustradora asturiana afincada n’Austria, trabaya internacionalmente con una mirada bien personal y unos personaxes llenos d’espresividá, inspiraos munches vegaes nes pequenes escenes de la vida cotidiana. La so trayectoria recibió, ente otres reconocencies, un premiu nacional de llibru infantil concedíu pol Ministeriu de Cultura austriacu.
Laura vive en Francia. Ye arquitecta especializada en bioconstrucción y, anque’l so oficiu trescurre ente planos y estructures, siempres caltuvo xuna fonda vocación artística.
Dos hermanes. Dos países. Una mesma sablera.
Y una morriña que, como’l mar, siempres acaba atopando’l camín de vuelta.
Porque ún puede vivir bien llueñe d’Asturies.
Pero’l salitre del Cantábricu siempres se lleva nel corazón
