Eduard Crespo, director de Parees, n’Uviéu: «Cada mural cuenta una parte de la hestoria y la cultura d’Asturies». «Intentamos que la tema tea venceyáu al llugar onde se pinta por que la xente sienta que’l mural pertenez-y». El Comercio /
Eduard Crespo dirixe Parees, el Festival d’Intervención Mural n’Uviéu, desque se punxo en marcha en 2017 de la mano de la Fundación Municipal de Cultura del Conceyu. So la so dirección, Parees llevó a artistes locales, nacionales ya internacionales a decenes de fachaes d’Uviéu, convirtiendo la ciudá no qu’él describe como «un muséu al campu».
Eduard Crespo dirixe Parees, el Festival d’Intervención Mural n’Uviéu, desque se punxo en marcha en 2017 de la mano de la Fundación Municipal de Cultura del Conceyu. Nun ye la so primer esperiencia na xestión del arte urbano: en 2007 fundó en Barcelona l’asociación Difusor, pionera na xestión de murios llegales y dende entós defende un modelu qu’él mesmu bautizó como muralismo «contextual y asitiáu». So la so dirección, Parees llevó a artistes locales, nacionales ya internacionales a decenes de fachaes d’Uviéu, convirtiendo la ciudá no qu’él describe como «un muséu al campu».
–¿Qué se va a faer anguaño en Parees? ¿Cuántos artistes y cuantos murios nuevos va haber?
–Vamos faer una edición bastante cuidada. Vienen trés chiques. Maite Rosende, del País Vascu, qu’en principiu diba pintar La Cometa na cai Foncalada, pero acaben de comunicanos que nun podemos al tratase d’una zona protexida pola fonte, asina que tamos en busca d’un alternativa. Nun tamos enoxaos, ye una zona qu’hai que curiar y tamos d’alcuerdu.
–¿Sobro qué diba tratar el muriu orixinal?
–Queríamos tratar de recuperar el mural qu’había nel mesmu edificiu, un cometa, que se borrar al recuperar la fachada. Llanzamos xuna consulta ciudadana pa pescudar quién lo había pintáu, pero nun hai constancia.
–Si camuda’l muriu, ¿tamién se camuda la temática?
–Sí, porque somos un festival de muralismo contextual y asitiáu: intentamos que la tema tea venceyáu al llugar onde se pinta por que la xente siente que’l mural pertenez-y. Si camuda’l muriu, vamos buscar otra tema rellacionada con esa paré, si nun ye posible daqué conectáu cola nuesa cultura, la nuesa fauna o la nuesa identidá.
–¿Y les otres dos artistes?
–Greta von Richthofen, xuna artista alemana afincada en Nava, que va pintar sobro la sacavera –sacavera– d’Uviéu na cai Vázquez d’Esmornia. Ye una tema que queríamos encetar dende va tiempu, pero nun atopábamos a l’artista fayadiza; a ella apasiónen-y los anfibios y yá trabayó esi motivu n’otros murales.
Y a lo último, Mar Herrera, de Xixón, que va intervenir nel barriu de Teatinos. Ta axuntándose con asociaciones de vecinos p’arrexuntar semeyes antigües del barriu y la so memoria obrera, y de ende va sacar el bocetu. Ta bien ilusionada, pero tamién nerviosa por ser el primer mural que fai. va acompañar unu de los nuesos productores, Cristian Mate, que tien muncha esperiencia ayudando a artistes a romper esi mieu.
–¿Con qué criteriu s’escueye a les artistes?
–De normal hai delles víes, xuna a partir del muriu; buscamos a daquién qu’encaxe cola temática pensada, y al aviesu, gústanos el trabayu d’una artista y entós buscamos un muriu. Buscamos artistes qu’escuchen el territoriu, non muralismo paracaidista.
–¿Cómo s’escueyen los murios onde se trabaya?
–Munches vegaes faemos consulta vecinal, anque cuesta que la xente participe, si nun vamos viendo hasta qu’atopamos un sitiu que nos guste. Cuntamos con arquiteutos técnicos que revisen les parés antes de pintar. Dacuando una fachada paez tar bien, y al xubir y vela de cerca apaecen mugores o resquiebros más fondos. Trabayamos con dineru público, asina que tenemos la responsabilidá d’asegurar que’l mural dure’l máximu tiempu posible-
–Amás de los trés murales principales, ¿qué más inclúi esta edición?
–Un mural comuñal nel túnel de San Nicolás Soria, impulsáu al pie de l’asociación Ciudá Naranco que va buscar voluntarios del barriu pa pintalo. La temática ye Colores en tránsitu que percuerre la gama cromática d’Asturies a lo llargo de les estaciones. Probablemente sía pa finales de setiembre. Tamién tenemos el taller de muralismo en familia nel Parque del Oeste, van ser unes venti places y van abrir sobre’l 27 d’agostu la inscripción. Tamién tenemos el taller de serigrafía de l’asociación Garabatu.
–Dempués de casi una década, ¿qué apurre’l festival a los barrios?
–Creo que somos l’únicu festival documentado nel mundu nel que tolos murales son contextualizados y asitiaos al empar: contextualizar tien en cuenta la redolada física del muriu, como los sos colores o testura y asitiáu implica arreyar a les capes sociales, a los vecinos pa entender esa decisión. Si repases tolos murales d’estos años, en cada mural puedes lleer nellos la hestoria, la cultura y la sociedá d’Asturies.
–¿Hai dalgún mural col que tenga especial ciñu?
–Ye difícil escoyer porque caúnu apurre daqué distintu. Gústame especialmente’l de Manolo Mesa, sobre la fábrica de lloza de San Cloyo, porque’l procesu incluyó una consulta vecina al traviés de redes sociales y l’artista visitó les cases de los antiguos trabayadores pa ver les cerámiques y asina les incorporales al mural. Ye una pena porque creo qu’esi edificiu va baltase llueu.
–¿En qué otros espacios gustaría-yos trabayar?
–Nós nun usamos lo que llamamos maquillaxe urbanu: nun pintamos pa decorar o enguapecer un espaciu degradáu, sinón onde la comunidá ta acordies con la temática y la manera de trabayar pa xenerar sentíu de pertenencia o sofitar a un colectivu. Reparar espacios degradaos ye otru tipu d’intervención que nun nos correspuende a nós.
–¿Cuál ye’l futuru de Parees?
–Llevamos dende 2017 pidiendo sofitu a la Conceyalía de Turismu pa documentar la ruta de murales, porque creemos que ye un muséu al campu gratuitu, tanto pa quien vive n’Uviéu como pa quien nos visita. L’añu pasáu tuvimos a puntu d’instalar códigos QR con información y un mapa en trípticu, pero por temes llegales nun salió alantre. Dacuando la burocracia esíxenos demasiáu y cuesta sacar les coses alantre nos plazos que precisamos.
lantre nos plazos que precisamos.
