N’asturianu, los nomes non cuntables designen materies o realidaes que nun se presenten como unidaes: lleche, ropa, lleña, agua, fariña… Cuando’l nome s’usa como non cuntable y l’axetivu va detrás o funciona como atributu, la concordancia ye neutra: La lleche ta frío. /Dexó la ropa tendío pela mañana./Echa lleña seco al fueu.
Nun ye que’l nome seya neutru: lleche, ropa y lleña siguen siendo nomes femeninos. Nestos exemplos, la marca neutra apaez na concordancia. El contestu tamién pue camudar la interpretación: Punxo una fueya seca enriba la mesa./Ta tol suelu enllenu de fueya seco.
Nel primer casu falamos d’una fueya concreta; nel segundu, d’un conxuntu indetermináu.
