Autora PAULA PRESA / Testo RAISA GORGOJO
Güei vamos a Arnao, onde conviven 415 millones d’años d’hestoria xeolóxica cola memoria d’una mina única. So los cantiles atópase unu de los xacimientos fósiles del Devónicu más importantes d’Europa. Y so’l mar Cantábricu, el Pozu Güelu escaváu en 1855, forma parte de la única mina submarina d’Europa.
En 1915, el mar terminó entrando nes sos galeríes. La mina cerró y, de magar, so tierra permanez un sieglu de silenciu.
- Paula Presa @lajacinto__ lleva esa memoria dende la infancia. Llicenciada en Belles Artes y fundadora de Géiser Uviéu, el so trabayu esquiza la síntesis de formes, llínees y colores, ente la tradición del tatuaxe americanu, la ilustración, la cartelería modernista y l’universu de William Morris, Universu qu’ilustra maxistralmente’l testu de Raisa:
LOS CÁMBAROS/CANGREJOS DEL POZU GÜELU
Un día bien curtiu d’agostu, tu na sablera, date un besito una andarica y unos bichinos elegantes con cascos de charol intenten robate la merienda.
Convídente a echar un partíu de futbito con una piedra negra y cúntente hestories sobro peces bien antiguos con estrelles que orbitaben sobro les sos cabeces, calamares vampiru, una ballena muerta.
Pol so cuerpu pasiábense cientos de pulpitos de color joya, agarraditos y namoraos, cenaben la so carne tienro y bono. Una madre que se partió en dos cuando les sos fíes fugaren/escapaben al sable. Tu yes una d’elles.
Agora toos esos animales allucinantes son piedres negres. Los sos escayos y el so coláxenu nutrieron una selva que nació no fondero del mar, tan al fondu que si sigues nadando vas salir a la tierra que se repliega hasta otra Tierra.
Devenir animal yera tar sola sobro’l sable, llueñe d’edificios pintaos de colores prácticos, cantando con cámbaros revoltosonos.
- Raisa Gorgojo, @serpente_sorridente profesora de Filoloxía Italiana na Universidá d’Uviéu y collaboradora n’El gran llibru de los páxaros (Blackie Books, 2023). En mayu de 2027 va publicar la so primer novela cola mesma editorial. Una portada sobro un llugar onde la tierra, el mar y la memoria atópense.
