D’Holanda al Arcón de Peña Mea: la historia detrás de la semeya del eclís qu’eslluma a Asturies. El profesor Gijs de Reijke planió a lo llargo de cuatro años l’alliniación esacta al traviés del arcu de roca: «Foi la sesión que preparé con mayor curiosidá de tola mio vida». LNE
Alliniar la Lluna, el Sol y l’emblemáticu Arcón de Peña Mea dende la distancia xusta nun ye cosa de casualidá. Ye’l resultáu de cuatro años de cálculos matemáticos, mapes dixitales y una caminata agotadora cargando con kilos de material fotográficu pela canal llavianesa. «Suelo llevar demasiao equipu, y lo mesmo l’ascensu como’l descensu dexáronnos derrengaos abondo. Pero foi una esperiencia única que caltengo vívidamente na memoria», confiesa’l fotógrafu y profesor de xeografía holandés Gijs de Reijke, autor de la imaxe qu’estos díes causa raxón nes redes sociales.
De Reijke, apasionáu de la xeomorfoloxía, la meteoroloxía y la bioloxía, viaxa pel mundu buscando nubes eléctriques, borrina o nieve pa llograr una atmósfera especial pa les sos composiciones. Sicasí, el so conocimientu de la orografía asturiana yera nulu. «La mio única visita a la España peninsular fuera al aeropuertu de Barcelona nuna escala. Asturies yera daqué nuevo dafechu pa mi, anque tengo un amigu que vive ellí», confiesa.
El «flechazu col paisaxe cantábricu» empezó va cuatro años dende la so casa nos Países Baxos. Cuando afayó l’eclís y les «escelentes oportunidaes qu’ufiertaba pa la fotografía de paisaxe», empezó «una busca en Google y vio que la franxa de totalidá travesaba’l norte d’España». Pa él, la imaxe que quería consiguir yera «al pie d’una formación rocosa singular». Y ehí apaecióse-y Peña Mea y el so Arcón, y empezó a proyectar «la sesión que preparé con mayor curiosidá de tola mio vida».
