Esti vienres 4 y sábadu 5 de setiembre celébrase en L.luarca la tercer edición de La Favorita de Xuan Bello, festival d’arte, pallabra y territoriu que recueye manifestaciones artístiques como la poesía, música, performance, arquitectura efímera, danza y arte sonoro. «Yá ye parte de la identidá cultural de L.luarca» El festival d’arte, palabra y territoriu celebra esti vienres y sábadu la so tercer edición na plaza Carmen y Severu Ochoa. INSTAGRAM
La música asturiana va tar presente en dos de les sos actividaes: el pregón inaugural y un conciertu de flauta, gaita y pianu con recital de testos de Xuan Bello; too ello cola participación de Flavio R. Benito, músicu col collaboró’l fináu escritor en dellos proyectos.
L.luarca volverá convertir los sos espacios públicos n’escenariu de creación contemporanea esti vienres y sábadu. La plaza Carmen y Severu Ochoa va acoyer los díes 4 y 5 de setiembre, de 20.00 a 23.00 hores, la tercer edición de «La Favorita de Xuan Bello», el Festival d’Arte, Palabra y Territoriu qu’axunta poesía, música, danza, performance, arquitectura efímera, arte sonoro ya instalación.
La propuesta nació col enfotu de establecer un diálogu ente la creación artística y el territoriu, faciendo que los mesmos espacios de L.luarca formen parte de les obres y esperiencies que se plantegen mientres el festival. La programación caltien esa filosofía y vuelve axuntar distintes disciplines y llinguaxes artísticos.
La primer xornada, el vienres 4, va tar protagonizada por «El nacimientu de les roses” o “El cantar de la bruxa», una propuesta na que l’agua, el fueu, la palabra y la música entemecer cola construcción d’un espaciu efímeru. El programa inclúi voces de Xuan Bello, un esconxuru, xuna queimada y el cantar de la guitarra.
El sábadu 5 va llegar la vez de «Retayos d’un poema futuru», cola participación de Lorenzo García-Andrade, Jonás de Murias, Flavio Benitu, Aída Falcón, Nuria Santos, El Peli, Óscar Camacho, Melissa Ferrada, Álvaro Arias, Carlos Asensio, Alberto Morell, Claudia Vega, Alberto Núñez y Fernando Renfijo.
Un festival amestáu a Xuan Bello El festival cunta col financiamientu del Conceyu de Valdés y el patrociniu de la Conseyería de Cultura del Gobiernu del Principáu d’Asturies. Pa la concejala de Cultura de Valdés, Clara García, caltener la propuesta supon tamién caltener el venceyu col escritor Xuan Bello, que’l so nome lleva’l festival dende’l pasáu añu.
«Qu’el festival lleve güei el nome de Xuan Bellu ye xuna manera de reconocer el so papel fundamental nesta iniciativa y, sobremanera, de caltener presente la so mirada sobro la cultura, sobro Asturies y sobro L.luarca», señala García. «Queremos que La Favorita siga siendo esi llugar d’alcuentru ente la palabra, l’arte y el territoriu qu’él imaxinó».
La primer edición celebrose en 2024, con una programación venceyada a les artes en vivu, la creación contemporanea, el pensamientu y les propuestes concebíes específicamente pa L.luarca. En 2025, tres el fallecimientu de Xuan Bello, el festival incorporó’l so nome como homenaxe y reconocencia a quien fuera xuna figura esencial na so creación y desenvolvimientu.
Pa García, llegar a esta tercer edición supon l’afitamientu d’una propuesta con personalidá propia dientro de la programación cultural de Valdés. «La Favorita ye yá una parte de la identidá cultural de L.luarca. Ye un festival distintu, que nun entiende la cultura como daqué qu’asocede namá dientro d’un escenariu, sinón como una esperiencia que se constrúi en contactu col espaciu, col territoriu y coles persones», afirma.
La responsable municipal anima a vecinos y visitantes a averase a la plaza Carmen y Severu Ochoa mientres les dos xornaes. «Nun fai falta conocer primeramente les disciplines nin los llinguaxes que vamos atopar. La Favorita ta precisamente pensada p’afayar, escuchar, mirar y dexase sosprender», apunta.
García destaca amás la capacidá del festival pa convertir L.luarca nun espaciu de creación. «La Favorita demuestra que los nuesos espacios públicos pueden convertise en llugares pa la esperimentación, pa la reflexón y pal alcuentru», sostien. Al so xuiciu, esti apueste contribúi tamién a proxectar L.luarca como «un territoriu culturalmente activu».
La concejala pon coles mesmes l’acentu na collaboración ente alministraciones pa caltener esti tipu d’iniciatives. «La collaboración institucional ye fundamental pa poder caltener y consolidar propuestes culturales calidable», afirma. «Dende’l Conceyu vamos siguir trabayando por que la cultura llegue a los nuesos espacios públicos y por que Valdés siga siendo un conceyu abiertu a la creación y a nueves formes d’espresión artística».
Mientres dos nueches, L.luarca va ser escenariu y materia de creación, cola palabra, l’arte y el territoriu como exes d’una propuesta que busca averar al públicu llinguaxes artísticos menos habituales.
