Nuevos usos para horros y paneres, la principal novedá de la reforma del Reglamentu Cultural d’Asturies. El Principáu va dexar que les construcciones con menor protección puedan dedicase a actividaes venceyaes al turismu rural, la hostelería o la comercialización de productos locales. RTPA / El Comercio
El Gobiernu asturianu va dexar nuevos usos para horros, paneres y cabazos coles mires de «favorecer el so caltenimientu, evitar el so abandonu y facilitar qu’estes construcciones tradicionales sigan formando parte activa de la vida económico y social del mediu rural». Esta ye una de les principales novedaes de la reforma del Reglamentu Cultural d’Asturies, que la Conseyería de Cultura, Política Llingüística y Deporte va someter a información pública a partir d’esti llunes.
Esti cambéu -trátase de la mayor reforma llevada a cabu nel reglamentu dende la so aprobación en 2015- incorpora bona parte de les llínees estratéxiques del Plan del Horru, qu’identifica la perda de funcionalidá económica de miles d’horros, paneres y cabazos y alvierte del so progresivu deterioru.
Énte esta situación, la Conseyería que lidera Vanessa Gutiérrez plantega «un cambéu d’enfoque» por que, amás de garantizar la so protección, estes construcciones tan representatives d’Asturies puedan tener un usu que contribuya al so caltenimientu: «La premisa ye clara. Un horru n’usu tien más posibilidaes de caltenese».
Pa ello, la norma estrema ente los bienes con máximos niveles de protección y aquellos catalogaos con protección parcial o inferior. De tala forma que los horros, paneres y cabazos declaraos Bien d’Interés Cultural (BIC) pol so valor históricu o etnográficu, incluyíos nel Inventariu de Patrimoniu Cultural d’Asturies (IPCA) o protexíos integralmente polos catálogos urbanísticos municipales, van caltener puramente los usos tradicionales de tenada, despensa o almacén. Sicasí, aquellos con protección parcial o inferior, van tener per primer vegada un réxime d’usos compatibles y van poder destinase a actividaes complementaries venceyaes al turismu rural, la hostelería, la cultura o la comercialización de productos locales.
Ensin alteriar materiales o elementos característicos.
Tamién van poder funcionar como espacios auxiliares acomuñaos a viviendes esistentes, puntos d’información turística o cultural, árees d’almacenamientu compatibles col so caltenimientu y pequenos establecimientos venceyaos a la producción agroalimentaria o l’artesanía tradicional. La reforma del reglamentu dexa abierta la puerta, amás, pa incorporar nuevos usos nel futuru por aciu los correspondientes desenvolvimientos técnicos.
Sía que non, «les nueves actividaes nun van poder tresformar estes edificaciones en construcciones convencionales nin alteriar la so tipoloxía, materiales o elementos característicos», precisa la Conseyería de Vanessa Gutiérrez. La reforma del reglamentu regula con más detalle’l treslláu d’horros, establez nuevos criterios de protección y crea una comisión asesora pa estudiar les construcciones esistentes y empobinar futures actuaciones de caltenimientu.
