José Manuel López ye doctor en Filosofía y atropa 4,5 millones de visualizaciones en YouTube: ‘Dacuando tenemos la mala costume d’esplicar con tecnicismos’. LNE/ Ye doctor en Filosofía y mientres 32 años exerció como profesor d’esta materia en distintos institutos asturianos. Nesi tiempu vio pasar seis lleis educatives, la llegada d’internet y el tresformamientu que traxeron les nueves tecnoloxíes a les aules. Tamién asistió, según la so esperiencia, a un retrocesu paulatín» de la comprensión llectora» y de «la cultura del esfuerzu». Facebook /youtube.com /blogspot.com /webnode.es/ jose_lopezgsrcia
Agora, un añu dempués de la so xubilación, atopó una nueva forma d’averase a los mozos colos vídeos divulgativos que publica en redes sociales y que yá algamen una media de 4,5 millones de visualizaciones en YouTube.
La so relación coles cámares, sicasí, empezó antes d’abandonar les aules. «Dime cuenta de qu’había alumnos que nun consiguíen entender los conceutos na hora de clase», recuerda. Aquella dificultá llevólu a buscar otra manera d’esplicar los conteníos. «Preparábayos pequeños vídeos de dos minutos y unviaba-yos por que pudieren velos en casa a manera de refuerzu». La esperiencia dexó-y comprobar de primera esquito que’l llinguaxe audiovisual podía convertise nun aliáu de la enseñanza.
«Dacuando los profesores tenemos la mala costume d’esplicar la Filosofía d’una forma bien técnica», reconoz, una vegada que comprobó que los vídeos curtios y cercanos pueden ser una ferramienta especialmente útil pa los estudiantes, porque dexen presentar conceutos complexos «nun llinguaxe afechu a lo qu’anguaño peracaben».
Tres la so xubilación dio un pasu más. Yá nun se llinda a utilizar el vídeu como sofitu a una clase, sinón que lo convirtió nuna actividá propia. «Quixi probar a espublizar conocencies, comentarios y opiniones que consideraba útiles», esplica. Nun momentu nel que les redes sociales adquirieron un protagonismu creciente, decidió ponese delantre de la cámara y compartir los sos conteníos.
Y llueu comprobó que’l formatu funcionaba. «Reparé que, xeneralmente, atraen más l’atención los vídeos que los audios», señala. De primeres concentró la so actividá en YouTube, pero adulces foi estendiéndola a otres plataformes: Facebook, Instagram y TikTok.
Y non tou ye Filosofía. Anque esta disciplina sigue ocupando un espaciu central nes sos publicaciones, López enceta tamién cuestiones d’actualidá. La clave, esplica, ta en caltener viva l’interés. «Gústame grabar vídeos y publicalos, ye una actividá apasionante», afirma.
Sicasí, el so ésitu nes redes nun-y fai perder de vista les dificultaes que repara na educación actual. «Ta fallando l’esfotu nel estudiu y la falta de vezu», sostien. Y sorraya que «los vídeos pueden sirvir como complementu, pero non como sustitutu de la formación tradicional».
«La comprensión llectora na enseñanza media suel dexar enforma que deseyar», llamenta; y magar atopó un nichu de mercáu colos vídeos, ye consciente de que «l’usu escesivu de los móviles y los dispositivos tecnolóxicos ye negativu». López cree que tienen de consumise «na so xusta midida» y que si, per un sitiu ,consumir vídeos divulgativos o d’actualidá puede ser «de gran ayuda», faelo de forma compulsiva «resta concentración y tiempu pa otres xeres como lleer o estudiar».
«Ye necesariu que los estudiantes aprovechen el so periodu d’aprendizaxe de la meyor manera posible», sostien. Y eso pasa, al so xuiciu, por recuperar una actitú que considera fundamental: l’interés. «Que sían interesaos, investiguen y esfruten del prestar de conocer», aportuna.
López mira amás con ciertu optimismu escontra un futuru marcáu por cambeos tecnolóxicos cada vez más rápidos. «El mundu ta camudando d’una manera acelerada», afirma, pero considera qu’esi tresformamientu «nun tien por qué ser una amenaza». «Abre innumberables posibilidaes que pueden ser aprovechaes por toos», celebra.
Dempués de más de trés décades esplicando a los alumnos qué pensaron Platón, Aristóteles, Kant o Nietzsche, López camudó la cayuela pola cámara y l’aula poles redes sociales. Pero’l propósitu,a última hora, sigue siendo asemeyáu: espertar nos mozos el gustu por faese entrugues y facilitar l’accesu a la conocencia. Solo camudó l’escenariu y, con él, la manera de llegar a quien tán al otru llau.
