L’últimu cuatrimestre del añu llega cargáu d’actividá, cultura y arte en Mieres. La concejala de Cultura, Nuria Ordóñez, acompañada de les técniques de la área, presentó güei la programación cultural de setiembre a avientu que, como ye habitual, inclúi cites para tolos gustos y públicos ente les que nun falten la música, el teatru, les tradiciones, una nueva esposición nel Pozu Santa Bárbara y una nueva “Caxa de Resistencia”, amás de FIASCU, ente otres munches actividaes. AXENDA
Imposible resumir un cuatrimestre d’eventos y por eso yá ta na cai l’axenda cultural por que naide pierda nenguna cita.
Esta programación, impulsada pola conceyalía de Cultura, ye frutu del trabayu conxuntu de les distintes árees municipales y tamién, poques gracies, del movimientu asociativu del conceyu. El llabor conxuntu fai posible que tengamos per delantre una seronda/iviernu bien enriquecedor. Pero l’actividá nun paró. Tres el Festival de la Cerveza Artesano, estos díes celebra’l Cristu de Turón y güei mesmu desenvolveráse nel PZSB la Gala Remanez Raigaños Veta amestada a la moda sostenible, amás del conciertu recital “Ser quien a cantar”, de Sofía Castañón, nel Auditoriu. A partir d’equí, numberoses cites n’este mesmu mes como’l conciertu de Silvia Quesada, acompañada d’Alfredo González, el día 18, o’l de Lucía Alonso y Rodrigo Sturm con “Ecos d’Iberoamérica”, el sábadu 19. Ensin escaecenos d’otra cita festiva de referencia como Los Mártires.
Programación cultural variada y calidable en Mieres con otros eventos destacaos nesti cuatrimestre como la nueva esposición nel Pozu Santa Bárbara, que va ser inaugurada n’ochobre, y que llega de la mano de l’artista y cineasta francesa Anne Horel, amestando mitoloxía, cultura dixital ya intelixencia artificial y xugando col colax dixital, el cine y l’imaxe en movimientu con un proyectu, Data Fossils”, “que nun va dexar indiferente a naide”, señaló Ordóñez.
