Indumentaria. Día’l traxe/
«Los traxes d’ayandesa» ye una obra dedicada al vistir tradicional asturiano y recupera pa la cultura del país un elementu hasta agora desconocíu: los traxes de boda de les muyeres d’Ayande.
«Los traxes d’ayandesa» llega de la mano del sellu editorial Fonte y preséntase esti martes 15 de setiembre, a les siete y media la tarde, na capiya Los Dolores de Grau. El preciu de venta al públicu d’esta edición llimitao y de lluxu ye de 39 euros.
Esti estudiu ye’l resultáu d’una investigación fecha por Alberto Suárez y Mario Baragaño sobre documentos procedentes del Archivu Históricu d’Asturies y de fondos del RIDEA.
El volume rescata más de 5.000 referencies a prendes de vistir, adornos y xoyería y inclui la determinación de más de cincuenta texíos diferentes usaos na confección de los traxes del país, munchos d’ellos de procedencia estranxera. Toa esta información cultural consta, mayormente, n’alcuerdos matrimoniales de persones nacíes nesti conceyu del occidente d’Asturies, fechaos de mediaos del sieglu XVIII a mediaos del sieglu XIX.
L’estudiu de Suárez y Baragaño, redactáu n’asturianu, ye’l primeru d’esta naturaleza que se publica dedicáu a un conceyu asturianu namás y destaca pola riqueza de los datos obteníos. Amás, la obra contién la reproducción de les fontes documentales orixinales en castellanu, lo que supón una aportación a la producción científico nesta materia por parte d’estos dos investigadores independientes.
