Publicado en Música, Musicasturiana.com

Asturies y Galicia atópense n’una «Verbena»

Asturies y Galicia atópense n’una verbena: asina suena’l nuevu cantar d’Eva Hevia y Kike Varela. Eva Hevia y Kike Varela xunen gaita asturiana y gallega con electrónica nuna una tema que’l so videoclip foi rodáu en Riosa.

Les gaites asturianes y gallegues atópense en ‘Verbena’, la nueva tema de los artistes Kike Varela y Eva Hevia, un cantar qu’entemez tradición y soníos electrónicos para reivindicar los venceyos culturales ente Galicia y Asturies. Musicasturiana.com

Dempués de llanzar en xunetu ‘BUMBUM‘, col que facía’l so primer averamientu a la música de raigañu, la cantante Eva Hevia da un pasu más nesa mesma dirección y publica agora ‘Verbena‘, un cantar qu’inclúi dalgún fragmentu n’asturianu y gallegu, entemez gaita d’estos territorios con música electrónica y qu’aporta con un videoclip nel que pue vese baille’l país. Pa facelo arródiase de destacaes collaboraciones: el productor Kike Varela -coautor del tema-, el gaiteru asturianu Daniel Meré, el gallegu Álvaro Puga y les componentes de Rellume.

«Nos últimos años, artistes d’estremaes partes del mundu alcontraron nos sos propios raigaños una fonte d’inspiración pa crear soníos nuevos y averar el folclor a xeneraciones y públicos que quiciabes nunca conectaren con él. De Rosalía a Bad Bunny o Quevedo, la música popular amosó que pue convivir colos soníos contemporáneos y convertise nun llinguaxe universal», desplica la nota prensa que presenta esti cantar. Asina ye como nació ‘Verbena’, que cunta «una historia d’amor nacida nuna romería».

«Kike Varela y Eva Hevia representen precisamente esa forma nueva d’entender la tradición. Dos artistes, procedentes de Galicia y Asturies que crucien agora los sos caminos«, recueye’l testu de presentación del tema. Los dos firmen a comuña la pieza, que cunta cola producción de Varela –DJ gallegu que ta arrasando nes fiestes gallegues cola so «electrofoliada» y qu’acumula más de 118.000 oyentes mensuales en Spotify- y Eva Hevia, cantante asturiana con una carrera emerxente que caleya pente’l pop, r&b y la electrónica.

Xunto a la música «electro-trad» de ‘Verbena’ siéntese una lletra que cunta una historia d’amor de branu ente un gallegu y una asturiana que se conocen nuna folixa. «Una historia aparentemente cenciella que sirve como puntu de partida pa poner en valor tolo que Galicia y Asturies comparten: la música, les fiestes, la tradición y una forma mui particular d’entender la cellebración», plantega la nota prensa. Amás, ye la primer vegada qu’Eva Hevia canta dalgún cachín de la lletra n’asturianu y tamién en gallego, uniendo a estos dos pueblos tamién pela parte llingüística.

“La verdá ye qu’Eva y yo yá faláremos nel pasáu al rodiu la posibilidá de collaborar. Fai unos meses surdió la idea de ‘Verbena’ y creí qu’ella yera la indicada pa esti llanzamientu. Fáime muncha ilusión facer dalgo qu’una a Galicia y Asturies», desplica’l productor Kike Varela. Per otru llau, Hevia sorraya que «trabayar con Kike foi un lluxu», porque siempre almiró «la so forma de llevar la tradición a los soníos d’anguaño«. «Enantes nun esperimentara esti amiestu d’electrónica con gaita gallega asturiana nun mesmu tema, pero la conexón de toos foi increíble y el resultáu fala por si mesmo», añade la cantante.

El cantar llega acompañáu d’un videoclip rodáu en Riosa -onde tien raigaños Eva Hevia-, dirixíu por David Quesada y Romo Herrera y nel qu’andechen baillando asturiano y col traxe’l país les trés componentes de Rellume –Alba Suárez, Ana Feito, Alba Estrada– y Andrea Álvarez. «‘Verbena nun conecta namás dos territorios, sinón tamién dos xeneraciones y dos maneres d’entender la música, amosando que los instrumentos tradicionales pueden evolucionar ensin perder aquello que lo fai reconocible», remata la nota prensa.

El single, publicáu’l pasáu 18 de setiembre, naz alredor d’una hestoria d’amor ente un gallegu y una asturiana que se conocen nuna verbena. La lletra combina fragmentos en gallegu y asturianu, ente que la producción incorpora la gaita gallega y l’asturiana, interpretaes por Álvaro Puga y Daniel Meré.

El cantar toma como puntu de partida uno de los elementos más reconocibles de la cultura popular de dambes comunidaes: les verbenes. A partir d’ende, Varela y Hevia, gallegu y asturiana, constrúin una tema que pretende averar los soníos tradicionales a una producción contemporanea y poner de mancomún elementos culturales de Galicia y Asturies

Autor:

Maestra de Llingua Asturiana Colexu Carmen Ruiz-Tilve - Uviéu