Publicado en Alimentos, Astronomía, Reconocimientu

Premios a dos muyeres referentes e innovadores

Ana Labad y Lucía González llogren galardones por innovación pesquera y diversificación económica. LNE

Dos iniciatives empresariales asturianes fueron estremaes pol Ministeriu d’Agricultura, Pesca y Alimentación na XVII edición de los Premios d’Excelencia a la Innovación para Muyeres Rurales. Trátased’Anchoes Hazas, de Llastres, @anchoashazas, impulsada por Ana Labad, y Ayande Stars, fundada por Lucía González Cuesta, dos proyectos qu’apuesten pola innovación dende ámbitos tan distintos como’l tresformamientu de productos pesqueros y la divulgación astronómica. Dase la casualidá de que dambes fueron premiaes, con anterioridá, col premiu Muyer Rural d’Asturies.

 

Ana Labad consiguió’l primer premiu na categoría d’innovación na actividá pesquera o acuícola por Anchoes Hazas, una empresa de Llastres dedicada a la ellaboración artesanal d’anchoes con bocarte del Cantábricu. El Ministeriu destaca’l so apueste pol aprovechamientu de los recursos, yá que reutiliza’l 99% de los subproductos xeneraos mientres l’actividá. La firma cunta, amás, con 14 trabayadores con contratu indefiníu.

Pela so parte, Lucía González Cuesta, doctora n’Astrofísica y fundadora d’Ayande Stars, llogró’l tercer premiu na categoría de diversificación de l’actividá económica del mediu rural. La so empresa avera l’astronomía y la divulgación científica a les zones rurales por aciu un modelu itinerante, de la que promueve la protección del cielu nocherniegu.

La entrega de premios celebrará’l próximu 15 d’ochobre, Día Internacional de les Muyeres Rurales, en Madrid. Los primeros premios tán dotaos con 18.000 euros, los segundos con 12.000 y los terceros con 7.500 euros. Los galardones reconocen proyectos impulsaos por muyeres que contribúin a xenerar actividá económica, empléu y nueves oportunidaes nel mediu rural.

Autor:

Maestra de Llingua Asturiana Colexu Carmen Ruiz-Tilve - Uviéu