Publicado en Pallabreru

Les nueves palabres de la RAE que nun dexen indiferente a naide

Mi Oviedo / De «gordofobia» a «basuraleza»: les nueves palabres de la RAE que nun dexen indiferente a naide. El diccionariu actualízase con miles d’incorporaciones que reflexen les esmoliciones y enclinos de la sociedá actual.

L’idioma español sigue evolucionando y el so principal obra de referencia acaba de dar un importante saltu p’adaptase a los nuevos tiempos. La Real Academia Española (RAE) presentó la 24.ª edición del Diccionariu de la llingua española, una actualización qu’incorpora más de 6.000 nueves entraes y reconoz oficialmente términos que yá formen parte de les conversaciones cotidianes, especialmente n’internet, les redes sociales y los alderiques sociales.

Ente les novedaes apaecen palabres tan habituales como «influencer», «pódcast», «gordofobia», «antiedad», «docuserie» o «ecoansiedad». Tamién atopen el so sitiu espresiones vinculaes al mediu ambiente, como «basuraleza», y otres rellacionaes cola salú, como «cardiosaludable» o «hantavirus».

La nueva edición reflexa cómo les tresformaciones sociales tán modificando’l vocabulariu. Asina, incorpórense términos como «edadista», «racializar», «trans» o «performativo», #ente que el desenvolvimientu tecnolóxicu dexa la so buelga con «metaverso» y les espresiones «intelixencia artificial» y «intelixencia artificial xenerativa».

Tampoco falten palabres procedentes d’ámbitos tan diversos como la gastronomía, la economía o l’actualidá. Ye’l casu de «AOVE», «esferificar», «macrogranja», «narcolancha», «bómber» o «fotogalería», que pasen a formar parte d’esta nueva edición.

Un diccionariu que camuda per dientro y per fora. La presentación tuvo llugar esti vienres en Madrid, con representantes de les 23 academies de la llingua española.

El director de la RAE, Santiago Muñoz Machado, destacó qu’esta ye la primer edición concebida directamente pa la redolada dixital. A diferencia de les anteriores, la versión impresa ellaboróse a partir de la dixital, y non al contrario.

El nuevu diccionariu axunta 99.990 artículos y cerca de 209.000 acepciones. La so edición en papel, que va publicar Espasa, va ocupar dos volumes y 3.606 páxines.

La renovación tamién algama la manera de consultar les palabres. Les distintes acepciones entámense agora atendiendo a la so frecuencia d’usu y les sos relaciones de significáu. Amás, amplíense los exemplos hasta algamar los 85.201 y revísense miles d’etimoloxíes.

La diversidá del español ocupa igualmente un llugar destacáu. Incorpórense 1.490 xentilicios y 1.570 voces propies de distintos países hispanofalantes, ente elles «bicisenda», «cocotaxi» o «motoconcho».

Doce años dempués de l’anterior edición completa, publicada nel 2014, l’Academia presenta asina un diccionariu que non solo recueye nueves palabres, sinón que tresforma la so estructura p’averase a la forma en que millones de persones falen, escriben y comuníquense acaldía.

Autor:

Maestra de Llingua Asturiana Colexu Carmen Ruiz-Tilve - Uviéu