Salvar los horros enantes de que seyan historia/ https://7dies.org/noticia_detalle.php?id=10484
La Conseyería de Cultura, Política Llingüística y Deporte concedió 400.107 euros en subvenciones pa caltener, restaurar y rehabilitar 102 horros, paneres, cabazos y otros elementos d’interés etnográficu. Les ayudes, correspondientes a la convocatoria d’anguaño, van permitir recuperar construcciones tradicionales en 41 conceyos y van contribuyir a caltener parte esencial del patrimoniu cultural y del paisaxe rural.
La resolución inclúi actuaciones n’horros y paneres, cabazos del occidente, cabañes de teitu de Somiedu y otros elementos de l’arquitectura popular, como fontes, payares y construcciones auxiliares. Les subvenciones tán empobinaes a particulares y entidaes ensin ánimu d’arriquecimientu que s’ocupen de caltener estes construcciones.
Con estes subvenciones, el Gobiernu d’Asturies contribúi a sufragar el costu d’unes obres que, en munchos casos, riquen conocencies especializaes y l’emplegu de materiales y téuniques tradicionales. Trátase de facilitar que les persones y entidaes propietaries puedan acometer les igües necesaries pa caltener les construcciones en bon estáu.
La resolución establez l’abonu íntegru de les ayudes concedíes y amplía los plazos pa facilitar les intervenciones. Asina, van poder executase hasta’l 15 d’ochobre de 2027 y les persones beneficiaries van tener un mes más, hasta’l 15 de payares del próximu añu, pa presentar la xustificación.
El Gobiernu va permitir dar un segundu usu a los horros y paneres pa evitar el so abandonu
El Gobiernu prepara una reforma de la normativa de patrimoniu que va permitir usar horros, paneres y cabazos p’actividae…

Asturies apuesta pol caltenimientu del patrimoniu cultural
La Conseyería dará más ayudes pa recuperar, caltener y sopelexar la cultura tradicional asturiana. Conceyos y asociacion…
