Publicado en 7DÍES, Artículos

«L’atapecer celta» por Héctor Fernández

L’atapecer celta. 01/11/2026 05:00 | Héctor Fernández 

 

Bien se sabe que les celebraciones d’estos díes vienen a ser la cristianización de creyencies previes mui intenses (y mui estenses) en bona parte d’Europa. Ye’l casu qu’anueche celebróse la Nueche d’Ánimes: dimos el pasu a la estación escura. La muria imaxinaria (la física ye infranquiable) alzada ente vivos y muertos tornóse trespasable, como’l vanu d’una puerta abierta.

Nesta nueche pasada los tovía presentes y quienes yá nun tán convivieron y “conmorrieron”: el mundu de los vivos y el de los muertos ficiéronse interpenetrables, el velu que los separa tornóse trespasable. En mediu mundu escenificóse’l conocíu “Halloween”, una celebración que, más qu’analoxíes, tien clares coincidencies coles nuestres tradiciones asturianes de la Nueche d’Ánimes.

Sicasí, d’un mou asemeyáu a como’l cristianismu llevó l’agua del mitu paganu al so molín doctrinal, el capitalismu (como nueva relixón) tamién se valió del ritu celta pa moldialu y conformalu a los sos fines… de mercantilismu y rentabilidá, cosa bastante coherente cola so lóxica, tamién hai que dicilo. Por concretar, un calabazón nestes feches multiplica (por más de cien) el so preciu en comparanza col restu del añu: asina, la fuercia motriz pasó del molín de la mitoloxía al de la relixón, y d’esti pasó al molín del mercáu.

Lo que tópicamente llamen “la escala de valores” vien camudando d’un mou sosteníu nel tiempu y dende va abondu tiempu. Traduzo y parafraseo a Borges: naide rebaxe a llárima o reproche esta constatación d’un solu fechu, unes llinies que nin valoren nin xulguen, que simplemente describen una realidá. Nun hai equí xuiciu nengunu (moral, políticu, social, espiritual), solo descripción.

Especulo agora: el mitu de fondu, el daveres operativu anguaño, el más modernu, ye paradóxicamente un mitu daveres antiguu, el mitu del rei Midas, quien tolo que tocaba tresformábase n’oru… Pero l’oru nun se come, bien lo sabíen los rapacinos que nesta fecha pidíen n’Asturies un espresivu “trucu o tratu” peles cases del país. Contábamelo mio güela: el de la Nueche d’Ánimes yera’l primer aguilandu del iviernu, la xente menudo diba peles cases cantando y pidiendo llambiotaes (claváu al “trucu o tratu” tan conocíu anguaño) y si nun-yos lo daben facíen una trastada o armaben una “fazaña”.

Según la mio querida “informante”, cantaba la reciella, la “rumia”: “Danos l’aguilando, si nos lo quies dar:/ somos rapacinos, tamos sin capar”. Yo daquella achacaba estes coses a la so inorancia pero entiendo agora que, ensin sabelo ella (nin yo mesmu), taba en realidá tresmitiéndome una concepción del mundu.

Autor:

Maestra de Llingua Asturiana Colexu Carmen Ruiz-Tilve - Uviéu