Autora AIDÉ MONTERO
Texto MAURICE MAETERLINCK (1862–1949
La nuestra portada de güei ta dedicada al universu inmensu y diminutu de los insectos, habitantes discretos y estraordinarios que humildemente sostienen bona parte del delicáu equilibriu de la naturaleza.
Nun fái tanto tiempu, pasiar pel campu yera enfusase nuna auténtica sinfonía de soníos: el cantar de los grillos, el runfíu de les abeyes, l’aletéu de les caparines, los saltapraos o’l titilar de les luciérnagas al anochecerín.
Una orquesta diminuta y universal que formaba parte de la banda sonora de la vida.
Güei, sicasí, esa música empieza a apagase.
L’amenorgamientu de les poblaciones d’insectos, provocada pola destrucción de los sos hábitats, l’agricultura intensiva, los plaguicidas y el cambéu climáticu, constitúi una de les señales más preocupantes del deterioru ambiental.
Tamién n’Asturies, onde la espansión d’especies invasores como l’aviespa asiática plantega nuevos desafíos pa nuestres abeyes, l’apicultura y la biodiversidá.
El nuestru territoriu sigue allugando una estraordinaria riqueza de pequeños habitantes: dende’l billoriu esplumadera y el zapateru hasta la vacalloria, ún de los escarabayos más grandes d’Europa,. Una diversidá munches vegaes desconocida.
Nun hai criatura insignificante cuando de la vida trátase.
- Aidé Montero @am.Ilustracion ye ilustradora y amiga del arte xaponés.. El so trabayu destaca pol usu de la tinta y la sobriedá nel tratamientu del
color. - Maurice Maeterlinck (Gante, Bélxica, 29 d’agostu de 1862 – Niza, Francia, 5 de mayu de 1949) foi un dramaturgu, poeta y ensayista y una de les figures más destacaes del simbolismu européu. En 1911 recibió’l Premiu Nobel de Lliteratura en reconocencia a la riqueza de la so obra.
Ente los sos títulos más conocíos destaca La vida de les abeyes (La Vie deas abeilles, 1901), un fascinante ensayu nel qu’esquiza l’universu d’estos pequeños seres, les sos formes d’organización, los sos comportamientos y los misterios de la vida nel truébanu, combinando la observación de la naturaleza con una fonda reflexón filosófica.